(GNS),09
હવામાન વિભાગે આગામી 7 દિવસ સુધી ગુજરાતમાં વરસાદી માહોલ યથાવત રહેવાની આગાહી કરી છે. તો આજે રાજ્યના કેટલાક વિસ્તારોમાં ભારે વરસાદ પડશે. અરવલ્લી, દાહોદ, મહિસાગર, વલસાડમાં ભારે વરસાદની આગાહી છે. તો દક્ષિણ ગુજરાતના કેટલાક જિલ્લાઓમાં ભારે વરસાદ પડશે. અમદાવાદ અને ગાંધીનગરમાં સામાન્ય વરસાદ પડશે. જેથી આવતીકાલથી રાજ્યમાં વરસાદનું જોર ઘટી શકે છે. વરસાદને કારણે કેટલાક વિસ્તારોમાં ઓરેન્જ અને યલો એલર્ટ જારી કરવામાં આવ્યું છે. લાંબા વિરામ બાદ દક્ષિણ ગુજરાતમાં મેઘરાજા પધરામણી કરી રહ્યા છે, તો આજે પણ મેઘરાજા દક્ષિણ ગુજરાત અને મધ્ય ગુજરાત પર પોતાની મહેરબાની વરસાવશે.
હવામાન વિભાગે દક્ષિણ ગુજરાતમાં ભારે વરસાદની આગાહી કરી છે અને ઓરેન્જ એલર્ટ જાહેર કર્યું છે. નર્મદા, સુરત, તાપી, નવસારી, વલસાડ, ડાંગ સહિત દાદરાનગર હવેલીમાં ઓરેન્જ એલર્ટ આપવામાં આવ્યું છે. જ્યારે મધ્ય ગુજરાતમાં ભારે વરસાદની આગાહી સાથે યલો એલર્ટ જાહેર કરવામાં આવ્યું છે. ભરૂચ સહિત વડોદરા, છોટાઉદેપુર, દાહોદમાં આજે ભારે વરસાદ પડી શકે છે. મહત્વનું છે કે, છેલ્લા 2 દિવસથી દક્ષિણ ગુજરાત સહિત મધ્ય ગુજરાતમાં વાદળો અવિરત વરસી રહ્યા છે.