વડોદરા.
પંચાયત સેવા પસંદગી મંડળ દ્વારા રવિવારે રાજ્યભરમાં તલાટીની પરીક્ષા લેવાનાર છે ત્યારે વડોદરા જિલ્લામાં પણ તૈયારીઓ પૂરજોશમાં ચાલી રહી છે. વડોદરા જિલ્લામાં 227 પરીક્ષા કેન્દ્રો ઉપરાંત 203 શાળા-કોલેજોમાં 75 હજાર વિદ્યાર્થીઓ તલાટીની પરીક્ષા આપવાના છે. જેના માટે જિલ્લા વહીવટી તંત્ર દ્વારા તમામ વ્યવસ્થા કરવામાં આવી છે.
જિલ્લા વિકાસ અધિકારી મમતાબેન હીરપરાએ આજે જણાવ્યું હતું કે, વડોદરા જિલ્લાની 203 શાળા-કોલેજોના 227 કેન્દ્રો પર 75210 વિદ્યાર્થીઓ તલાટીની પરીક્ષામાં ભાગ લઈ રહ્યા છે. વડોદરા જિલ્લાના વિવિધ કેન્દ્રો પર રાજ્યભરમાંથી વિદ્યાર્થીઓ પરીક્ષા આપવાના છે ત્યારે જિલ્લા વહીવટી તંત્ર દ્વારા તમામ તૈયારીઓ પૂર્ણ કરી દેવામાં આવી છે. જેમાં જિલ્લા પંચાયતો દ્વારા એક હેલ્પલાઈન નંબર પણ જાહેર કરવામાં આવ્યો છે, જે હેલ્પલાઈન નંબર પર ફોન કરીને ઉમેદવાર પોતાના કેન્દ્રની માહિતી મેળવી શકશે. જિલ્લા પંચાયતમાં કાર્યરત આ હેલ્પલાઈન નંબર 0265- 2438110 છે.
તેમણે વધુમાં જણાવ્યું હતું કે, જિલ્લામાં મોટાભાગના પરીક્ષા કેન્દ્રો પારુલ યુનિવર્સિટી ખાતે આવેલા છે ત્યારે પારુલ યુનિવર્સિટીના પ્રવેશદ્વાર પર એક ખાસ હેલ્પ ડેસ્ક પણ ઉભું કરવામાં આવશે.
જ્યાં પરીક્ષાર્થીઓ તેમના કેન્દ્રો વિશે જરૂરી માહિતી મેળવી શકે છે. તમામ પરીક્ષા કેન્દ્રો સીસીટીવીથી આવરી લેવામાં આવ્યા છે, જ્યારે પરીક્ષા કેન્દ્ર પર પૂરતો પોલીસ બંદોબસ્ત તૈનાત કરવામાં આવ્યો છે.