ગાંધીનગર: 10મી વાઈબ્રન્ટ ગુજરાત ગ્લોબલ સમિટનું ઉદ્ઘાટન 10મી જાન્યુઆરી, 2024ના રોજ પીએમ નરેન્દ્ર મોદીની અધ્યક્ષતામાં અને દેશ-વિદેશના મહાનુભાવોની હાજરીમાં થવા જઈ રહ્યું છે. ગાંધીનગર દરેકને આવકારવા માટે સંપૂર્ણ રીતે તૈયાર છે.
પીએમ મોદી સહિતના મહેમાનોના સ્વાગત માટે ગુજરાતની રાજધાની ગાંધીનગરને દુલ્હનની જેમ શણગારવામાં આવી રહ્યું છે. જેમાં ગાંધીનગરની હરસમા વિધાનસભાથી મહાત્મા મંદિર સુધીના સેન્ટ્રલ વિસ્ટાને રાત્રીના સમયે વાઈબ્રન્ટ-ત્રિરંગા-લેસર લાઈટો સહિતની વિવિધ થીમ આધારિત લાઈટોથી શણગારવામાં આવે છે, પરિણામે સેન્ટ્રલ વિસ્ટા શહેરવાસીઓ માટે સેલ્ફી પોઈન્ટ બની રહ્યું છે.
વાઈબ્રન્ટ સમિટ અંતર્ગત ગુજરાત વિધાનસભાને સોનેરી રોશનીથી શણગારવામાં આવી છે. જ્યારે સેન્ટ્રલ વિસ્ટામાં સ્ટેચ્યુ ઓફ યુનિટીની પ્રતિકૃતિ, વિવિધ ફૂલો અને વૃક્ષો પર વિવિધ રંગોની હારમાળા, રંગબેરંગી શિલ્પો, વાઇબ્રન્ટ ગુજરાત 2024 દર્શાવતા વિવિધ આકર્ષક લોગો અને દાંડી કુટીરને લાઇટિંગ-લેસરથી શાનદાર રીતે શણગારવામાં આવ્યું છે. આ ‘સેન્ટ્રલ વિસ્ટા’નો અદભૂત રાત્રિનો નજારો શહેરવાસીઓ માટે ખાસ આકર્ષણનું કેન્દ્ર બન્યો છે. આ ઉપરાંત સ્વર્ણિમ સંકુલ-1 અને 2, ઉદ્યોગ ભવન, કલેક્ટર કચેરી, બેંક ઓફ બરોડા ભવન, સાયન્સ કોલેજ સહિતની સરકારી ઇમારતોને તિરંગા આધારિત વિવિધ રોશનીથી શણગારવામાં આવી છે.