વિસનગરના બહુચરનગર રોડ પર જડેશ્વર તળાવ પાસે નેલિયા ખાતે ખુલ્લી જગ્યામાં જુગાર રમાય છે. આવી બાતમી મળતા શહેર પોલીસ ઘટના સ્થળે પહોંચી જુગાર રમતા 7 લોકોની ધરપકડ કરી હતી. જ્યારે બે શખ્સો નાસી છૂટ્યા હતા. પોલીસે સ્થળ પરથી 29,450 રોકડા, 6 મોબાઈલ, એક સ્વિફ્ટ કાર અને એક મોટરસાઈકલ મળી કુલ રૂ. 5,68,450નો મુદ્દામાલ કબજે કર્યો હતો. પકડાયેલા અને ફરાર શખ્સો સામે વિસનગર સીટી પોલીસ મથકે ગુનો નોંધી વધુ તપાસ હાથ ધરી છે.
વિસનગર શહેર પોલીસ મથકના પીઆઈ એસ.એસ.નિનામા, પીએસઆઈ એન.એન.ગોહેલ સહિતનો પોલીસ સ્ટાફ પેટ્રોલીંગમાં હતો. દરમિયાન કડા દરવાજા પાસે ગુપ્ત બાતમી મળી હતી કે જડેશ્વર તળાવ પાસે નેલિયામાં ખુલ્લી જગ્યામાં જુગાર રમાતો હોય છે. તેના આધારે પોલીસે ઘેરો ઘાલ્યો હતો અને પોલીસને સ્થળ પર રેડ કરતા જોઈને ભાગવાનો પ્રયાસ કરી રહેલા 7 લોકોને પકડી લીધા હતા. જ્યારે બે નાસી છૂટ્યા હતા. વિસનગર શહેર પોલીસ મથકે 9 સામે ગુનો નોંધી વધુ તપાસ હાથ ધરી છે.