મુંબઈઃ છેલ્લા બે ત્રિમાસિક ગાળાના આર્થિક વિકાસ દર (જીડીપી)ના ડેટા પરથી કહી શકાય કે 2023ના છેલ્લા છ મહિનામાં બ્રિટનની અર્થવ્યવસ્થા મંદીમાં ધકેલાઈ ગઈ છે.
સપ્ટેમ્બર ક્વાર્ટરમાં 0.10 ટકા નકારાત્મક રહ્યા બાદ, યુનાઇટેડ કિંગડમ (યુકે)નો જીડીપી પણ ડિસેમ્બર ક્વાર્ટરમાં 0.30 ટકા નીચે આવ્યો છે.
જો અર્થતંત્રમાં જીડીપી સતત બે ત્રિમાસિક ગાળા સુધી નકારાત્મક રહે તો કહી શકાય કે દેશ મંદીમાં ધકેલાઈ ગયો છે.
બ્રિટનમાં મંદી વડા પ્રધાન ઋષિ સુનકને તેમની પુનઃ ચૂંટણીમાં પડકાર આપી શકે છે. ઓફિસ ફોર નેશનલ સ્ટેટિસ્ટિક્સના ડેટા અનુસાર ડિસેમ્બર ક્વાર્ટરમાં ઘટાડો 2021ના પ્રથમ ક્વાર્ટર પછી સૌથી મોટો હતો.
બ્રિટનમાં ચાલુ વર્ષના બીજા ભાગમાં ચૂંટણી યોજાવાની છે. બ્રિટનનો આર્થિક વિકાસ દર છેલ્લા બે વર્ષથી લગભગ સ્થિર છે, પરંતુ બેન્ક ઓફ ઈંગ્લેન્ડને 2024માં વૃદ્ધિની અપેક્ષા છે.