અમદાવાદ. માર્કેટ રેગ્યુલેટર સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) કેટલીક જાહેર ક્ષેત્રની બેંકો અને સરકારી માલિકીની કંપનીઓ માટે 25 ટકાની લઘુત્તમ પબ્લિક શેરહોલ્ડિંગ જરૂરિયાતનું પાલન કરવાની સમયમર્યાદા ઓગસ્ટ 2024 સુધી લંબાવી શકે છે. સૂત્રોના જણાવ્યા અનુસાર, PSU બેંકો અને કંપનીઓ તબક્કાવાર રીતે આ શરતનું ધીમે ધીમે પાલન કરી શકે તે માટે આવી છૂટ આપવામાં આવશે. હાલમાં આ બેંકો ક્વોલિફાઈડ ઈન્સ્ટીટ્યુશનલ પ્લેસમેન્ટ (QIP) દ્વારા ભંડોળ એકત્ર કરી રહી છે અને આ પ્રક્રિયામાં બેંકોમાં સરકારનો હિસ્સો પણ ધીમે ધીમે ઘટી રહ્યો છે. સૂત્રોએ એમ પણ જણાવ્યું કે હાલમાં ડાયરેક્ટ ઈશ્યુ દ્વારા જાહેર ક્ષેત્રની બેંકોના શેર વેચવાની કોઈ યોજના નથી. હાલમાં, જાહેર ક્ષેત્રની પાંચ બેંકોમાં સરકારનો હિસ્સો 75 ટકાથી વધુ છે, જેમાં ઈન્ડિયન ઓવરસીઝ બેંક, યુકો બેંક, સેન્ટ્રલ બેંક ઓફ ઈન્ડિયા, પંજાબ એન્ડ સિંધ બેંક અને બેંક ઓફ મહારાષ્ટ્રનો સમાવેશ થાય છે. વર્તમાન બજાર દરે આ પાંચ બેન્કોમાં સરકારના હિસ્સાનું મૂલ્ય રૂ. 65,000 કરોડ છે.