મુંબઈથી સુરત વચ્ચે દોડનારી દેશની પ્રથમ ડબલ ડેકર ટ્રેન હવે ઈતિહાસ બની જશે. ફ્લાઈંગ રાની ટ્રેનમાંથી ડબલ ડેકર ટેગ હટાવી દેવામાં આવ્યો છે. હવે ફ્લાઈંગ રાની એક્સપ્રેસ ટ્રેન એલએચબી કોચ સાથે દોડશે. 117 વર્ષ જૂની પ્રથમ ડબલ ડેકર ફ્લાઈંગ રાની એક્સપ્રેસ ટ્રેનમાં 44 વર્ષ બાદ ફેરફાર કરવામાં આવ્યો છે. ફ્લાઈંગ રાની હવે ડબલ ડેકર તરીકે નહીં પરંતુ રાજધાની, તેજસ અને અન્ય એક્સપ્રેસ ટ્રેનોની જેમ દોડશે.
કેન્દ્રીય મંત્રી દર્શના જર્દોષે કાંદિવલીથી નવનિર્મિત ટ્રેનને લીલી ઝંડી બતાવી. આ દરમિયાન દર્શના જરદોષે કહ્યું કે ફ્લાઈંગ એક્સપ્રેસ ટ્રેનને અપગ્રેડ કરવામાં આવી છે. ટ્રેનને નવા લુક સાથે ડિઝાઇન કરવામાં આવી છે જે 110 kmphની ઝડપે દોડી શકે છે. ટ્રેનને વધુ આરામદાયક બનાવવા માટે ફ્લાઈંગ રાની એક્સપ્રેસમાં ફેરફાર કરવામાં આવ્યો છે.
ઉલ્લેખનીય છે કે, વર્ષ 1906માં પહેલીવાર ફ્લાઈંગ રાની એક્સપ્રેસ ટ્રેન મુંબઈ અને સુરત વચ્ચે શરૂ થઈ હતી. વલસાડના તત્કાલિન જિલ્લા કલેક્ટરના પત્ની દ્વારા આ ટ્રેનનું નામ ફ્લાઈંગ રાની રાખવામાં આવ્યું હતું અને 44 વર્ષ પહેલા 1979માં ફ્લાઈંગ રાની ટ્રેનને ડબલ ડેકરમાં ફેરવવામાં આવી હતી.