ટક્કર એટલી જોરદાર હતી કે શોર્ટ સર્કિટના કારણે આખી ટ્રક બળીને ખાખ થઈ ગઈ હતી
સુરત જિલ્લામાં અકસ્માતના બનાવો સામે આવતા રહે છે. ખાસ કરીને બેદરકારીપૂર્વક ડમ્પરો ચલાવવાને કારણે ઘણા નિર્દોષ લોકોના મોત થાય છે. ત્યારે આજે ગમખ્વાર અકસ્માતની વધુ એક ઘટના સામે આવી છે. અકસ્માતને લઈને લોકોના ટોળા પણ ત્યાં એકઠા થઈ ગયા હતા.
ઘટનાની પ્રાપ્ત માહિતી અનુસાર, જિલ્લાના વિહાનથી ટીંબા ગામ જતા રોડ પર એક કરૂણ અકસ્માત સર્જાયો હતો. અહીં બેદરકારીપૂર્વક દોડી રહેલા બાઇક અને ડમ્પર વચ્ચે અકસ્માત સર્જાયો હતો. જેમાં ત્રણ બાઇક સવાર યુવકોના ઘટના સ્થળે જ મોત નિપજ્યા છે. અકસ્માતના આ બનાવમાં ત્રણેય યુવકોને ગંભીર ઈજાઓ થતાં ત્રણેય યુવકોના ઘટનાસ્થળે જ મોત નિપજ્યા હતા.
ભરૂચના પાનોલીના વતની વિજય વસાવા, અનિલ વસાવા અને વિપુલ વસાવા બાઇક પર વિહાનથી ટીંબા ગામ તરફ જઈ રહ્યા હતા. જ્યાં ડમ્પરે ટક્કર મારીને બાઇક સવાર ત્રણ લોકોને કચડી નાખ્યા હતા. આ ઘટનામાં બાઇક પર સવાર ત્રણ લોકોના ઘટનાસ્થળે જ મોત થયા હતા.
અકસ્માત બાદ ડમ્પરમાં શોર્ટ સર્કિટ થતાં સમગ્ર ટ્રકમાં આગ લાગી હતી. ઘટનાની જાણ કામરેજ પોલીસ અને ફાયર વિભાગને કરવામાં આવતા બંને ટીમો ઘટના સ્થળે પહોંચીને કાર્યવાહી હાથ ધરી છે.
ઘટનાની જાણ થતા ફાયર વિભાગ અને પોલીસ ઘટના સ્થળે પહોંચી હતી અને ફાયર વિભાગની ટીમે ડમ્પરમાં લાગેલી આગને કાબુમાં લીધી હતી. સાથે જ આ સમગ્ર મામલે પોલીસ દ્વારા કાયદેસરની કાર્યવાહી કરવામાં આવી રહી છે.