રાજ્યના અનેક શહેરોમાં છેલ્લા બે દિવસથી વરસાદ પડી રહ્યો છે. ગઈકાલે સૌરાષ્ટ્ર અને ઉત્તર ગુજરાત બાદ આજે દક્ષિણ ગુજરાતમાં કમોસમી વરસાદ થયો છે. સુરતના વિવિધ વિસ્તારોમાં સવારથી જ વરસાદ પડી રહ્યો છે. સુરતના મજુરા, અઠવા, અડાજણ, રાંદેર અને પાલ વિસ્તારમાં વરસાદ પડ્યો હતો. હવામાન વિભાગે પણ બે દિવસ વરસાદની શક્યતા વ્યક્ત કરી છે.
સુરત શહેર સહિત જિલ્લાના વાતાવરણમાં પલટો આવ્યો છે. ઓલપાડ, બારડોલી અને કામરેજ તાલુકામાં કમોસમી વરસાદે ખેડૂતોની ચિંતામાં વધારો કર્યો છે, અનેક વિસ્તારોમાં પાણી ભરાઈ જવાથી લોકોને ભારે હાલાકીનો સામનો કરવો પડ્યો હતો. ગાજવીજ સાથે કમોસમી વરસાદથી ઉનાળુ પાકને નુકસાન થવાની ધારણા છે. ખેડૂતો પર ચિંતાના વાદળો ઘેરાયા છે.
બીજી તરફ વલસાડ શહેર અને આજુબાજુના ગ્રામ્ય વિસ્તારોમાં પણ કફોડી સ્થિતિ જોવા મળી રહી છે. પવન સાથે વરસાદના કારણે અનેક વિસ્તારોમાં વીજળી ડુલ થઈ ગઈ છે. કમોસમી વરસાદના કારણે કેરીના પાકને નુકસાન થવાની સંભાવના છે.