ગુજરાતમાં મેઘરાજાની લાંબા સમયથી રાહ જોવાઈ રહી છે. જુલાઈમાં મેઘરાજાની ધમાકેદાર બેટિંગ બાદ ઓગસ્ટ મહિનો કોરો ગયો, હવે ખેડૂતો સપ્ટેમ્બરમાં સારા વરસાદની આતુરતાપૂર્વક રાહ જોઈ રહ્યા છે. આ દરમિયાન ખેડૂતો માટે સારા સમાચાર આવ્યા છે. હવામાન વિભાગે કેટલાક જિલ્લાઓમાં હળવાથી મધ્યમ વરસાદની આગાહી કરી છે.
વરસાદની સંભાવના ધરાવતા જિલ્લાઓ:-
હવામાન વિભાગના જણાવ્યા અનુસાર અમદાવાદ, ભાવનગર, અમરેલી, દાહોદ, વલસાડ, નવસારી, ડાંગ, તાપી અને સુરતમાં વરસાદની આગાહી કરવામાં આવી છે. ગુજરાતમાં 6 સપ્ટેમ્બરથી વરસાદી સિસ્ટમ વધુ તીવ્ર બનશે. હવામાનશાસ્ત્રી અંબાલાલ પટેલના જણાવ્યા અનુસાર 6 થી 12 સપ્ટેમ્બર દરમિયાન રાજ્યના વિવિધ ભાગોમાં વરસાદ પડશે. 10 થી 15 સપ્ટેમ્બર સુધી અરબી સમુદ્ર અને બંગાળની ખાડી પર પણ સિસ્ટમ બનશે. જેના કારણે સૌરાષ્ટ્રના દરિયાકાંઠાના વિસ્તારોમાં વરસાદ પડશે.