ગાંધીનગર: અમૂલ દૂધ પીતા હૈ ઈન્ડિયા…ના-ના, હવે માત્ર ભારતના લોકો જ નહીં પણ અમેરિકાના લોકો પણ આ ગીત ગાશે. કારણ કે હવે અમેરિકા પણ અમૂલ બ્રાન્ડનું સુખનું દૂધ પીશે. આ કોન્ટ્રાક્ટની સાથે અમૂલ બ્રાન્ડના માલિક ગુજરાત કો-ઓપરેટિવ મિલ્ક માર્કેટિંગ ફેડરેશને પણ નવો ઈતિહાસ રચ્યો છે. યુએસમાં ભારતીય ડેરી બ્રાન્ડની આ પ્રથમ એન્ટ્રી છે.
ભારતની અગ્રણી ડેરી કંપની અમૂલે વેપાર જગતમાં વધુ એક સફળતા હાંસલ કરી છે. ગુજરાત મૂળની આ કંપની હવે અમેરિકામાં દૂધનો બિઝનેસ કરશે. અમૂલ યુ.એસ.માં તાજા દૂધનું ઉત્પાદન શરૂ કરવાની યોજના બનાવી રહી છે, જેના માટે ગુજરાત સ્થિત કંપનીએ 108 વર્ષ જૂના મિશિગન મિલ્ક પ્રોડ્યુસર્સ એસોસિએશન (MMPA) સાથે યુએસ ઇસ્ટ કોસ્ટ અને મિડવેસ્ટમાં તાજા દૂધનું વેચાણ કરવા માટે કરાર કર્યા છે. બજાર
ગુજરાત કો-ઓપરેટિવ મિલ્ક માર્કેટિંગ ફેડરેશનના મેનેજિંગ ડિરેક્ટર જયેન મહેતાએ જણાવ્યું હતું કે, “મને એ જાહેરાત કરતાં આનંદ થાય છે કે અમૂલ યુ.એસ.માં તાજા દૂધના ઉત્પાદનો લોન્ચ કરશે. તેમણે કહ્યું કે અમે 108 વર્ષ જૂની ડેરી સહકારી સાથે એમઓયુ પર હસ્તાક્ષર કર્યા છે. યુએસ કરાર પર હસ્તાક્ષર કર્યા મિશિગન મિલ્ક પ્રોડ્યુસર્સ એસોસિએશન (MMPA) એ તેની વાર્ષિક મીટિંગ 28 માર્ચે આ સોદાની જાહેરાત કરી.
કંપની યુએસ માર્કેટમાં કયું દૂધ લોન્ચ કરશે?
આ પ્રથમ વખત છે જ્યારે અમૂલ દૂધ અમેરિકા જેવા ભારતની બહાર ક્યાંય પણ બજારોમાં પ્રવેશ કરશે. મહેતાએ કહ્યું કે ભાવ પણ સારો મળશે. અમૂલ યુએસમાં અમૂલ બ્રાન્ડ હેઠળ એક ગેલન (3.8 લિટર) અને અડધા ગેલન (1.9 લિટર) પેકમાં તાજા દૂધની શ્રેણી લોન્ચ કરશે. જેમાં 6 ટકા મિલ્ક ફેટ સાથે અમૂલ ગોલ્ડ, 4.5 ટકા મિલ્ક ફેટ સાથે અમૂલ શક્તિ, 3 ટકા મિલ્ક ફેટ સાથે અમૂલ ફ્રેશ અને 2 ટકા મિલ્ક ફેટ સાથે અમૂલ સ્લિમનો સમાવેશ થાય છે.
અમૂલ એ ભારતમાં ઘરેલું નામ છે. જે ભારતની સુપર બ્રાન્ડ્સમાંની એક છે. એટલું જ નહીં, ભારતમાં ‘શ્વેત ક્રાંતિ’ લાવવામાં પણ અમૂલે ઘણું યોગદાન આપ્યું છે. તેની સફળતાને કારણે ભારતમાં મોટા પાયે ડેરી સહકારી મંડળીઓનો પ્રસાર થયો અને રાષ્ટ્રીય ડેરી વિકાસ બોર્ડની સ્થાપના થઈ.