ડીસામાં અઢી કરોડના ખર્ચે બનેલ ગાર્ડનને ખુલ્લો મુકવા હાઈકોર્ટે આદેશ કર્યો હોવા છતાં પાલિકા દ્વારા ગાર્ડન ખોલવામાં વિલંબ થતા અરજદારે ફરી પાલિકાને નોટીસ ફટકારી છે. ડીસામાં કરોડો રૂપિયાના ખર્ચે નાનાજી દેશમુખ ગાર્ડનનું નિર્માણ કરવામાં આવ્યું છે, પરંતુ શાસક પક્ષના આંતરિક વિખવાદના કારણે અનેક પ્રશ્નો ઉભા થતા આખરે ગાર્ડનને કોલ્ડ સ્ટોરેજમાં મુકી દેવાયો હતો, જો કે પ્રજ્ઞાચક્ષુઓ દ્વારા જિલ્લા કલેકટરને લેખિત અને મૌખિક અરજીઓ કરવામાં આવી હતી. નાગરિકોની વિનંતી બાદ પણ મુખ્યમંત્રી તરફથી કોઈ નિરાકરણ ન આવતાં જાગૃત નાગરિક સુભાષભાઈ ઠક્કરે હાઈકોર્ટમાં ફરિયાદ કરતાં હાઈકોર્ટે આ ગાર્ડનને ફરીથી ખોલવાનો આદેશ કર્યો હતો. જો કે હાઇકોર્ટના આદેશ બાદ પણ આજદિન સુધી બગીચો શરૂ ન કરતાં અરજદાર સુભાષભાઇ ઠક્કરે પાલિકાને નોટિસ આપી કોર્ટના તિરસ્કારની કાર્યવાહી હાથ ધરી છે.
કન્ટેમ્પ્ટ કોર્ટની કાર્યવાહી…
આ નોટિસથી વાકેફ નાગરિક અને ધારાશાસ્ત્રી સુભાષભાઈ ઠક્કરે જણાવ્યું હતું કે અગાઉ વિવાદોના કારણે ગાર્ડન લાંબા સમયથી બંધ હતો. આથી અમે હાઈકોર્ટમાં રજૂઆત કરી હતી અને ગાર્ડન ખોલવાનો આદેશ કર્યો હતો, હાઈકોર્ટના આદેશ છતાં હજુ સુધી ગાર્ડન શરૂ થયો નથી. આથી અમે પાલિકાને નોટિસ આપી છે અને કોર્ટના તિરસ્કારની કાર્યવાહી પણ કરી છે.