નવી દિલ્હી: રિઝર્વ બેંક ઓફ ઈન્ડિયાએ નવા વર્ષની શરૂઆતમાં ફરી એકવાર સોનાની મોટી ખરીદી કરી છે. નવા વર્ષના પ્રથમ મહિનામાં આરબીઆઈની ખરીદી 20 મહિનાની ઊંચી સપાટીએ પહોંચી છે. જોકે, RBIએ ગયા વર્ષના છેલ્લા બે મહિનામાં સોનું ખરીદવાનું ટાળ્યું હતું.
સોનાના ભાવમાં વધારો કરવામાં કેન્દ્રીય બેંકોની ખરીદીએ મુખ્ય ભૂમિકા ભજવી છે. સોનાના ભાવમાં હાલમાં રેકોર્ડ વધારો જોવા મળી રહ્યો છે. જ્યાં સ્થાનિક બજારમાં સોનું રૂ.67,000ના સ્તરને પાર કરી ગયું છે. જ્યારે આંતરરાષ્ટ્રીય કિંમતો $2,200ના રેકોર્ડ સ્તરે છે.
વર્લ્ડ ગોલ્ડ કાઉન્સિલના તાજેતરના અહેવાલ મુજબ, જાન્યુઆરી 2024 દરમિયાન, વિશ્વભરની કેન્દ્રીય બેંકોએ 39 ટન સોનાની ચોખ્ખી ખરીદી કરી હતી. આ સતત આઠમો મહિનો છે જ્યારે કેન્દ્રીય બેંકો દ્વારા સોનામાં રોકાણ વધ્યું છે. જે ડિસેમ્બરની સરખામણીમાં બમણાથી વધુ છે. વિશ્વભરની સેન્ટ્રલ બેંકોએ ડિસેમ્બર 2023 દરમિયાન 17 ટન સોનું ખરીદ્યું હતું.
રિપોર્ટ અનુસાર સૌથી મોટી ખરીદી તુર્કીની સેન્ટ્રલ બેંક દ્વારા જાન્યુઆરી 2024માં કરવામાં આવી હતી. તુર્કીની સેન્ટ્રલ બેંકે આ સમયગાળા દરમિયાન તેના સોનાના ભંડારમાં 12 ટનનો વધારો કર્યો છે. જાન્યુઆરી 2024ના અંત સુધીમાં તુર્કીનો સોનાનો ભંડાર વધીને 552 ટન થઈ ગયો હતો. ચીનની સેન્ટ્રલ બેંક પીપલ્સ બેંક ઓફ ચાઈના 10 ટન સોનાની ખરીદી સાથે બીજા સ્થાને આવી છે.
ભારતની મધ્યસ્થ બેંક, RBI, જાન્યુઆરી 2024માં લગભગ 9 ટન સોનાની ખરીદી સાથે ત્રીજા ક્રમે છે. ભારતનો સોનાનો ભંડાર હવે વધીને 812 ટન થઈ ગયો છે. ઈરાનના સોનાના ભંડારમાં ઓક્ટોબર 2023 પછી પહેલીવાર એક મહિનામાં વધારો થયો છે. ઉપરાંત, જુલાઈ 2022 પછી આરબીઆઈના સોનાના ભંડારમાં આ સૌથી મોટો વધારો છે.