કેન્દ્ર સરકારે પાન કાર્ડ અને આધાર કાર્ડને લિંક કરવાની અંતિમ તારીખ 31 ડિસેમ્બર, 2025 નક્કી કરી છે. આ સમયમર્યાદા સેન્ટ્રલ બોર્ડ ઓફ ડાયરેક્ટ ટેક્સિસ (CBDT) દ્વારા નક્કી કરવામાં આવી છે, જેનો ઉદ્દેશ્ય ટેક્સ સિસ્ટમને વધુ પારદર્શક બનાવવા અને નકલી PAN નો ઉપયોગ રોકવાનો છે. સરકારે પહેલાથી જ સ્પષ્ટ કરી દીધું છે કે જેઓ નિર્ધારિત સમય મર્યાદા સુધીમાં PAN-આધાર લિંક નહીં કરે તેમના PANને નિષ્ક્રિય જાહેર કરી શકાય છે, જેનાથી ઘણા રોજિંદા કાર્યોને અસર થશે.
PAN અને આધારને લિંક કરવું શા માટે મહત્વનું છે?
આઈટીઆર ફાઇલ કરવા, બેંક ખાતું ખોલવા, મ્યુચ્યુઅલ ફંડ અથવા શેરબજારમાં રોકાણ અને મોટા વ્યવહારો વગેરે જેવા આવકવેરા સંબંધિત લગભગ દરેક કામ માટે પાન કાર્ડ જરૂરી છે, જ્યારે આધાર કાર્ડ એક વિશિષ્ટ ઓળખ છે, જે બાયોમેટ્રિક અને ડેમોગ્રાફિક ડેટા સાથે જોડાયેલ છે. સરકાર ઇચ્છે છે કે યુઝરની ઓળખને એક જ સિસ્ટમ સાથે જોડવામાં આવે, જેથી કરચોરી અટકાવી શકાય અને પારદર્શક, એકીકૃત કર માળખું બનાવી શકાય. આ કારણોસર પાન-આધાર લિંક કરવું ફરજિયાત કરવામાં આવ્યું છે.
પાન-આધારને ઓનલાઈન અથવા SMS દ્વારા કેવી રીતે લિંક કરવું?
PAN અને આધારને લિંક કરવાની સૌથી સરળ રીત આવકવેરા ઈ-ફાઈલિંગ વેબસાઈટ દ્વારા છે. વેબસાઇટ પર જાઓ અને ‘ક્વિક લિંક્સ’માં ‘લિંક આધાર’નો વિકલ્પ પસંદ કરો. અહીં આધાર મુજબ PAN નંબર, આધાર નંબર અને નામ ભરો. આ પછી, ઇ-પે ટેક્સ દ્વારા નિશ્ચિત ફી ચૂકવો અને OTP દાખલ થતાં જ લિંકિંગ પૂર્ણ થઈ જાય છે.
આ કામ એસએમએસથી પણ કરી શકાય છે. આના માટે મોબાઈલથી UIDPAN આધાર નંબર અને PANNumber લખીને 567678 અથવા 56161 પર મોકલવાનો રહેશે.
