ડીસા ન્યુઝ: બનાસકાંઠા જીલ્લાના ડીસાના માલગઢ ગામમાં ગત રાત્રે એક જ પરિવારના સાત સભ્યોએ જંતુનાશક દવા ગળી આત્મહત્યાનો પ્રયાસ કર્યો હતો. સાત સભ્યોને ડીસાની સરકારી હોસ્પિટલમાં સારવાર માટે ખસેડવામાં આવ્યા હતા અને ત્યારબાદ વધુ સારવાર માટે પાલનપુર હોસ્પિટલમાં ખસેડાયા હતા. હવે પિતા-પુત્રની હાલત વધુ ગંભીર હોવાથી તેમને ખાનગી હોસ્પિટલમાં દાખલ કરવામાં આવ્યા હોવાનું જાણવા મળે છે.
બનાવની પ્રાપ્ત વિગતો મુજબ ડીસા તાલુકાના માલગઢમાં વાલ્મીકી પરિવાર રહે છે. નાગુભાઈ વાલ્મિકી મજૂરી કરીને પરિવારનું ગુજરાન ચલાવે છે. મોડી રાત્રે નગુભાઇ, તેમની બે પુત્રી, ત્રણ પુત્રો અને તેમની માતાએ જંતુનાશક દવા પીને આત્મહત્યાનો પ્રયાસ કર્યો હતો. ઘટનાની જાણ થતાં જ આજુબાજુના લોકો અને સંબંધીઓ પહોંચી ગયા હતા અને તમામને તાત્કાલિક ડીસાની સરકારી હોસ્પિટલમાં સારવાર માટે લઈ ગયા હતા.
ડીસાની સરકારી હોસ્પિટલમાં પ્રાથમિક સારવાર આપ્યા બાદ વધુ સારવાર માટે પાલનપુરની સરકારી હોસ્પિટલમાં ખસેડવામાં આવ્યો હતો. જ્યાં પિતા-પુત્રની હાલત નાજુક હોવાથી તેઓને પાલનપુરની ખાનગી હોસ્પિટલમાં રીફર કરાયા હતા. ઘટનાની જાણ થતા પોલીસ કાફલો પહોંચી ગયો છે અને આપઘાતનો પ્રયાસ શા માટે કરવામાં આવ્યો તે સહિતની સંપૂર્ણ માહિતી મેળવવામાં વ્યસ્ત છે.