ભુજ ન્યુઝ : છેલ્લા કેટલાક દિવસોથી એવું લાગી રહ્યું છે કે ગુજરાતમાં જાણે ગરમી નથી અને ચોમાસાએ દસ્તક આપી છે. કચ્છમાં આજે અનેક વિસ્તારોમાં ભારે વરસાદ થયો છે. ભારે વરસાદને કારણે શહેરોના માર્ગો પરથી નદીઓ વહેતી હોય તેવા દ્રશ્યો સર્જાયા છે. જ્યારે ભુજ-નખત્રાણા હાઈવે પાણીમાં ગરકાવ થઈ ગયો છે.
છેલ્લા કેટલાક દિવસોથી સમગ્ર ઉનાળુ ચોમાસા જેવો નજારો કચ્છમાં જોવા મળી રહ્યો છે. કચ્છમાં આજે પણ સવારથી વાદળછાયું વાતાવરણ રહ્યું હતું. જોતજોતામાં જિલ્લાના અનેક વિસ્તારોમાં હળવોથી ભારે વરસાદ થયો હતો. નખત્રાણા પંથકમાં ભારે પવન સાથે મુશળધાર વરસાદ વરસ્યો હતો. ભારે વરસાદના કારણે નખત્રાણા નગરમાં પાણી ભરાયા હતા. રસ્તાઓ જાણે નદી વહેતી હોય એમ લાગતું હતું.
ભારે વરસાદને કારણે ભુજ-નખત્રાણા-લખપત હાઈવે પર પાણી ભરાયા હતા. હાઈવે પરથી વહેતું પાણી નદીનું સ્વરૂપ લેતું જોઈ શકાય છે. નખત્રાણા ઉપરાંત માંડવીમાં ગઢશીશા આસપાસ પણ વરસાદી માહોલ જોવા મળ્યો હતો. કચ્છના લખપતમાં મુશળધાર વરસાદને કારણે કુંડી ધોધ જીવંત થયો છે. ધોધનો નયનરમ્ય નજારો જોવા પ્રવાસીઓની ભીડ ઉમટી પડી હતી.