રાજકોટ જિલ્લાના જેતલસર પાસે બે હથિયારધારી બાઈક પર આવેલા બદમાશોએ છરીના ઈશારે પેટ્રોલ પંપની લૂંટ ચલાવી હતી અને મોટી મારડ પાસેના પેટ્રોલ પંપ પર પેટ્રોલ પંપના કર્મચારીને લૂંટવાનો પ્રયાસ કર્યો હતો. આ કેસમાં રાજકોટ ગ્રામ્ય ક્રાઈમ બ્રાન્ચની ટીમે ગુનાનો ભેદ ઉકેલી જેતપુર તાલુકાના પાંચપીપળાના રાજ વલ્લભ ભાડેલિયા અને રવિ ઉર્ફે ભુરો જેંટી કંડોરિયાની ધરપકડ કરી હતી. જેતપુર તાલુકા પોલીસ સ્ટેશન વિસ્તારના જેતલસર ગામ ડેદરવા રોડ નાપરા પેટ્રોલપંપ પાસે ગત તારીખ 17/6 ના રોજ રાત્રીના સાડા દસ વાગ્યાના સુમારે બે અજાણ્યા સ્પ્લેન્ડર મોટર સાયકલ નંબર વગરના ઈસમોએ લૂંટ ચલાવી હતી.
જેમાં પેટ્રોલ પંપના કર્મચારીઓને છરી અને લાકડીઓથી ધમકાવી પેટ્રોલ પંપમાંથી 50 હજાર રૂપિયા રોકડા લૂંટી લેવાયા હતા. 17900ની લૂંટ કરી નાસી છૂટ્યા હતા જે અંગે જેતપુર તાલુકા પોલીસ મથકે આઈ.પી.સી. કલમ 392, 504, 114 મુજબ અજાણ્યાનો ગુનો નોંધ્યો હતો. આથી રાજકોટ રેન્જ આઈજી અશોકભાઈ યાદવ, રાજકોટ ગ્રામ્ય જિલ્લા પોલીસ અધિક્ષક જયપાલસિંહ રાઠોડે લુંટના અજાણ્યા બનાવ અંગે રાજકોટ ગ્રામ્ય એલસીબી પીઆઈ વી.વી.ઓડેદરા, પીએસઆઈ એચ.સી.ગોહિલને સુચના આપી હતી.
અને એલસીબી સ્ટાફના જવાનોની અલગ-અલગ ટીમોના માર્ગદર્શન હેઠળ લૂંટના ગુનાની તપાસ કરવામાં આવી હતી જે દરમિયાન એલસીબી પીએસઆઈ ડી.જી. બડવા, હેડ કોન્સ્ટ. દિવ્યેશભાઈ સુવા, નિલેશભાઈ ડાંગર, વીરરાજભાઈ ધાંધલને મળેલી અંગત બાતમીના આધારે બંને આરોપીઓને પાંચપીપળા ગામેથી પકડી પાડવામાં આવ્યા હતા. આરોપીઓ પાસેથી લુંટાયેલ રૂ. 17,900 રોકડા, લૂંટમાં વપરાયેલ નંબર પ્લેટ વગરનું રૂ.25,000નું બાઇક, રૂ.10,000ની કિંમતના બે મોબાઇલ ફોન કબજે કરાયા છે.
આરોપીઓએ બોડી મારડ નજીક માતેશ્વરી પેટ્રોલ પંપ પર લૂંટનો પ્રયાસ કર્યો હોવાની કબૂલાત કરી છે. હાલ બંનેની ધરપકડ કરી તપાસ અર્થે જેતપુર તાલુકા પોલીસને સોંપવાના પ્રયાસો હાથ ધરવામાં આવ્યા છે. આ કામગીરીમાં ગ્રામ્ય એલસીબી પીઆઈ વી.વી.ઓડેદરા, પીએસઆઈ ડી.જી.બડવા, એચ.સી.ગોહિલ, એએસઆઈ મહેશભાઈ જાની, હેડ કોન્સ. નિલેશભાઈ ડાંગર, દિવ્યેશભાઈ સુવા, વિરરાજભાઈ ધાંધલ, વાસુદેવસિંહ જાડેજા, શકિતસિંહ જાડેજા, ધર્મેશભાઈ બાવળીયા તથા પો.કોન્સ. કૌશિકભાઈ જોષી, ભાવેશભાઈ મકવાણા, મહેશભાઈ સરીખડા, મેહુલભાઈ સોનરાજ, ડો.અમુભાઈ વિરડા, રજાકભાઈ બિલખીયા, અબ્દુલભાઈ શેખ, અનિરૂધસિંહ જાડેજા ફરજ પર રહ્યા હતા.
જ્યારે આરોપીઓએ પેટ્રોલ પંપ પર લૂંટની ઘટનાને અંજામ આપ્યો ત્યારે તેમની પાસે બંદૂક જેવું લાઈટર હતું. આરોપીનો ઈરાદો આ બંદૂકને લાઈટર બતાવીને હુમલાખોરને ડરાવી પૈસા પડાવવાનો હતો.
પોલીસ સૂત્રોના જણાવ્યા અનુસાર અત્યાર સુધીની તપાસમાં આ બંને આરોપીઓ સામે અગાઉનો કોઈ ગુનો કે ગુનાહિત ઈતિહાસ બહાર આવ્યો નથી. એટલે કે આરોપીનો આ કદાચ પહેલો ગુનો હતો. લૂંટના ઈરાદા અંગે આરોપીઓને પૂછતાં જાણવા મળ્યું હતું કે, બંને આરોપીઓ કોઈ ધંધો કરતા નથી, તેમને મોજ-મસ્તી કરવા માટે પૈસાની જરૂર હતી, જેથી પૈસા પડાવવાના ઈરાદે આ ગુનાને અંજામ આપ્યો હતો.