સુરતના પાંડેસરા વિસ્તારમાં એક યુવકે ડમ્પર નીચે આવીને આત્મહત્યા કરી હોવાની ચોંકાવનારી ઘટના સામે આવી છે. આ સમગ્ર ઘટના નજીકમાં લાગેલા સીસીટીવી કેમેરામાં કેદ થઈ ગઈ છે. પોલીસે અકસ્માતે મોતનો ગુનો નોંધી સમગ્ર મામલે તપાસ હાથ ધરી છે.
પ્રાપ્ત માહિતી અનુસાર પાંડેસરા તિરુપતિ સર્કલથી અલથાણ જતા રોડ પર એક ડમ્પર પસાર થઈ રહ્યું હતું. ડમ્પર રોડની બાજુમાંથી યુ-ટર્ન લઈ રહ્યું હતું ત્યારે એક યુવક ડમ્પરના પાછળના ટાયરની આગળ કૂદી ગયો હતો. ડમ્પરનું ટાયર ફરી વળતાં એક યુવકનું મોત થયું છે. યુવકે ડમ્પર આગળ કૂદીને આત્મહત્યા કરી લેતા હોબાળો મચી ગયો હતો.
આ સમગ્ર ઘટના નજીકમાં લાગેલા સીસીટીવી કેમેરામાં કેદ થઈ ગઈ હતી. સીસીટીવી ફૂટેજમાં જોઈ શકાય છે કે એક ડમ્પર આવી રહ્યું હતું. જ્યારે ડમ્પર યુ-ટર્ન લઈને પરત ફરે છે. એટલામાં એક યુવક ચાલતો આવ્યો. ડમ્પર પાસે પહોંચતા જ યુવકે ડમ્પરના પાછળના વ્હીલ આગળ કૂદી પડ્યો હતો. ઘટનાની જાણ થતા પોલીસ કાફલો પણ ઘટના સ્થળે પહોંચી ગયો હતો.
પોલીસ તપાસમાં મૃતક યુવકની ઉંમર 30 વર્ષની આસપાસ હોવાનું જાણવા મળ્યું છે. તેમજ મૃતક યુવક કોણ છે અને તેણે શા માટે આપઘાત કર્યો તે અંગે પોલીસે અકસ્માત મોતનો ગુનો નોંધી તપાસ શરૂ કરી છે.