અમદાવાદઃ રાજકોટ લોકસભા બેઠક પરથી ભાજપના ઉમેદવાર પુરષોત્તમસિંહ રૂપાલા સામે ક્ષત્રિયોનો રોષ વધી રહ્યો છે. આજે 2જી એપ્રિલની સવારે અમદાવાદમાં એક હજારથી વધુ ક્ષત્રિયો શક્તિ પ્રદર્શનમાં રસ્તા પર ઉતરી આવ્યા હતા. ક્ષત્રિય પુરૂષોત્તમસિંહ રૂપાલાની ટિકિટ રદ કરવાની માંગ કરી રહ્યા છે.
આજે સવારથી જ અમદાવાદમાં ‘રુપાલા હટાવો, દેશ બચાવો’ના નારા સાથે ક્ષત્રિયો રસ્તા પર ઉતરી આવ્યા છે. ક્ષત્રિય સમાજના વિવિધ સંગઠનોના લોકો સવારે અમદાવાદ કલેક્ટર કચેરીએ પહોંચ્યા હતા. તેઓએ હાથમાં બેનરો પકડીને રૂપાલા વિરુદ્ધ સૂત્રોચ્ચાર કર્યા હતા. વિરોધ પ્રદર્શનમાં ક્ષત્રિય સમાજની મહિલાઓ પણ જોડાઈ હતી. રૂપાલાને હટાવવાની ઉગ્ર માંગ સાથે ક્ષત્રિય મહિલાઓએ જૌહર કરવાની તૈયારી દર્શાવી હતી. ક્ષત્રિયોના વિરોધને જોતા અમદાવાદ કલેક્ટર કચેરી બહાર સવારથી જ 200થી વધુ પોલીસ તૈનાત કરવામાં આવી હતી.
ક્ષત્રિય સમાજ વતી અમદાવાદ કલેક્ટર કચેરી જતા પહેલા રૂપાલા સામે રેલી કાઢવામાં આવી હતી. અમદાવાદના બત્રીશી ભવનથી કલેક્ટર કચેરી સુધી ક્ષત્રિય સમાજની રેલી કાઢવામાં આવી હતી. આ રેલીમાં 1 હજારથી વધુ ક્ષત્રિયો જોડાયા હતા. રેલીમાં રૂપાલા હટાવો અને દેશ બચાવોના નારા લગાવવામાં આવ્યા હતા.
ક્ષત્રિય સમાજના આગેવાન ઋતુરાજસિંહ ચુડાસમાએ જણાવ્યું હતું કે, રાજકોટ લોકસભા બેઠકના ભાજપના ઉમેદવાર પુરુષોત્તમ રૂપાલાએ અણગમતી ટિપ્પણી કરીને ક્ષત્રિય સમાજની મહિલાઓનું અપમાન કર્યું છે. રામ પણ ક્ષત્રિય હતા એમ કહીને ભાજપ રામના નામે વોટ માંગે છે. કદાચ રૂપાલા આ વાત ભૂલી ગયા છે.
ક્ષત્રિય સમાજની માંગ છે કે રૂપાલાની ટિકિટ રદ કરવામાં આવે. સરકાર આ મામલે બેઠકો યોજી રહી છે, પરંતુ તે બેઠકોમાં ક્ષત્રિય સમાજના આગેવાનોને બોલાવવામાં આવ્યા નથી. તેથી સરકાર સાથે કોઈ પણ સંજોગોમાં સમાધાન કરવામાં આવશે નહીં. રૂપાલા લોકસભાની ચૂંટણી લડશે તો ક્ષત્રિય સમાજ વિરોધ કરશે.
સમાજના આગેવાન શિલ્પાબાએ જણાવ્યું હતું કે, અમારી સ્પષ્ટ માંગણી છે કે રૂપાલાની ટિકિટ રદ કરવામાં આવે અને તેમની જગ્યાએ અન્ય સમાજના ઉમેદવારને ટિકિટ આપવામાં આવે. જો રૂપાલા ચૂંટણી લડશે તો ક્ષત્રિય સમાજ અંત સુધી વિરોધ કરશે. ક્ષત્રિય સમાજના ઇતિહાસથી સૌ વાકેફ છે. ભૂતકાળમાં ક્ષત્રિય સમાજની મહિલાઓ પણ જૌહર કરી ચૂકી છે. આજે કળિયુગમાં પણ ક્ષત્રિય સમાજની મહિલાઓ જરૂર પડ્યે જૌહર કરવા તૈયાર છે.
આખરે ક્ષત્રિય આગેવાનોએ મહિલાઓને એક કરી અમદાવાદ કલેક્ટરને આવેદનપત્ર આપ્યું હતું. ક્ષત્રિય સમાજે કલેક્ટરને આવેદન આપ્યું છે કે લોકસભાની ચૂંટણી માટે ઉમેદવારી પત્ર ભરવાની તારીખ પહેલા પુરૂષોત્તમ રૂપાલાની ઉમેદવારી રદ કરવામાં આવે.