ઊંઝા તાલુકાના ત્રણ ગામમાં એક જ રાતમાં તસ્કરો ત્રાટક્યા, ઊંઝા પોલીસે ગુનો નોંધી તપાસ હાથ ધરી છે. ઊંઝા તાલુકાના કરણપુર, રણછોડપુરા અને દાસજ ગામમાં મધરાતે તસ્કરોએ હુમલો કર્યો હતો. જેમાં રણછોડપુરા ગામે આવેલી દૂધ ઉત્પાદન સહકારી ડેરીના દરવાજાનું તાળુ તોડી તસ્કરો અંદર પ્રવેશ્યા હતા. તેઓએ ડેરીની અંદરની તિજોરી તોડીને રોકડ રકમ લઈ લીધી હતી. જેમાં ઊંઝા પોલીસે આઈ.પી.સી. કલમ 457, 380 હેઠળ કેસ નોંધીને તપાસ હાથ ધરવામાં આવી હતી. જેમાં ડેરીના સંચાલક દ્વારા ઊંઝા પોલીસ સ્ટેશનમાં ફરિયાદ નોંધાવવામાં આવી હતી અને ડેરીમાંથી રૂ.1,90,400 રોકડાની ચોરી થઈ હોવાની ફરિયાદ નોંધાઈ હતી.
આ ઉપરાંત દાસજ મેડિકલ અને પાર્લરને પણ નિશાન બનાવાયા હતા. જેમાં શટર તોડી અંદાજીત 50 હજારની રોકડ રકમ મળી આવી હતી. ઊંઝા વિસ્તારમાં તસ્કરો સતત ચોરીના બનાવોને અંજામ આપીને જતા રહે છે. કરણપુરમાં પણ તસ્કરોએ હંગામો મચાવી દૂધ ઉત્પાદન સહકારી ડેરીનો દરવાજો તોડી રોકડ સહિત કિંમતી સામાનની ચોરી કરી હતી. જેમાં કરણપુર દૂધસાગર ડેરીના પ્રમુખ દ્વારા ઊંઝા પોલીસ સ્ટેશનમાં ગુનો નોંધવામાં આવ્યો હતો. જેમાં ઊંઝા પોલીસે આઈ.પી.સી. કલમ 457, 380 મુજબ રૂ.83,950 રોકડની ચોરીની ફરિયાદ અજાણ્યા ચોર ઇ. સામે નોંધાઇ હતી. જેમાં પોલીસે તસ્કરોને પકડવા કમર કસી હતી.