તાઇવાનમાં ટાયફૂન ચેમ્પીના ખતરાને કારણે શુક્રવારે લગભગ સમગ્ર ટાપુ પર જનજીવન થંભી ગયું હતું. વાવાઝોડું ચોક્કસપણે નબળું પડી રહ્યું છે, પરંતુ તેમ છતાં તાઈવાનને સીધું ટકરાવાનો ભય હજુ પણ છે. સત્તાવાળાઓએ ભારે પવન અને મુશળધાર વરસાદની સંભાવના વચ્ચે સાવચેતીના પગલાં લીધા છે. તોફાનના કારણે અત્યાર સુધીમાં એક વ્યક્તિનું મોત થયું છે, જ્યારે 94 લોકો ઘાયલ થયા છે. સરકારના જણાવ્યા અનુસાર, લગભગ 1,300 લોકોને પહાડી વિસ્તારોમાંથી સુરક્ષિત સ્થળોએ ખસેડવામાં આવ્યા છે.
931 ફ્લાઇટ્સ રદ, નાણાકીય બજારો પણ બંધ
વાવાઝોડાને કારણે હવાઈ અવરજવર પર વ્યાપક અસર જોવા મળી રહી છે. તાઇવાનના પરિવહન મંત્રાલયના જણાવ્યા અનુસાર, શુક્રવારે તમામ 262 સ્થાનિક ફ્લાઇટ્સ રદ કરવામાં આવી હતી. આ સિવાય 669 આંતરરાષ્ટ્રીય ફ્લાઈટ્સ પણ રદ કરવી પડી હતી.
જો કે, ઉત્તર અને દક્ષિણને જોડતી હાઇ-સ્પીડ રેલ સેવાઓ સામાન્ય રીતે કાર્યરત હતી. મેટ્રો સહિતની સાર્વજનિક પરિવહન સેવાઓ ચાલુ રહી પરંતુ રાજધાની તાઈપેઈમાં વરસાદ વચ્ચે તેમાં ઘટાડો કરવામાં આવ્યો.
વાવાઝોડાના ખતરાને જોતા શુક્રવારે તાઇવાનના નાણાકીય બજારો પણ બંધ રહ્યા હતા. ચીનના દરિયાકાંઠે આવેલા તાઇવાન-નિયંત્રિત કિનમેન ટાપુઓમાં જ શાળાઓ અને કચેરીઓ સામાન્ય રીતે ખુલ્લી રહેવાની હતી.
