પાકિસ્તાનમાંથી એક મોટા સમાચાર સામે આવ્યા છે. બલૂચિસ્તાનના લાસબેલા જિલ્લામાં સુરક્ષાદળો પર મોટો હુમલો થયો છે. મળતી માહિતી મુજબ, આ હુમલો N-25 નેશનલ હાઈવે પર કરવામાં આવ્યો હતો, જ્યાં પાકિસ્તાની સેનાનો કાફલો જઈ રહ્યો હતો. પ્રારંભિક માહિતી અનુસાર, આ હુમલામાં 23થી વધુ જવાનોના મોત થવાની આશંકા છે. અન્ય ઘણા સૈનિકો પણ ઘાયલ થયા હોવાનું કહેવાય છે. મીડિયા રિપોર્ટ્સ અનુસાર, આ ઘટના લાસબેલાના કશારી વિસ્તારમાં બની હતી. ફ્રન્ટિયર ફોર્સના 15 જેટલા વાહનોનો કાફલો અહીં આગળ વધી રહ્યો હતો. કાફલાને નિશાન બનાવીને બ્લાસ્ટ કરવામાં આવ્યો હતો. વિસ્ફોટ બાદ સુરક્ષા વાહનમાં આગ લાગી હતી. ઘાયલ જવાનોને પહેલા બેલા કેમ્પ લઈ જવામાં આવ્યા હતા.
આ હુમલાનો આરોપ બલૂચ લિબરેશન આર્મી એટલે કે BLA પર લગાવવામાં આવી રહ્યો છે. આ સંગઠન છેલ્લા ઘણા મહિનાઓથી બલૂચિસ્તાનમાં સુરક્ષા દળો, સરકારી ઈમારતો અને રોડવે પર હુમલા વધારી રહ્યું છે. BLA દાવો કરી રહ્યું છે કે તેના લડવૈયાઓ પાકિસ્તાની સુરક્ષા દળોને નિશાન બનાવી રહ્યા છે. અહેવાલો અનુસાર, લાસબેલાના કશારી વિસ્તારમાં ફ્રન્ટિયર ફોર્સના લગભગ 15 વાહનોના કાફલાને નિશાન બનાવવામાં આવ્યું હતું. વિસ્ફોટ બાદ 23થી વધુ જવાનોના મોતની આશંકા છે. અન્ય ઘણા સૈનિકો પણ ઘાયલ થયા હોવાનું કહેવાય છે.
આ ઘટના બાદ સુરક્ષાદળોએ વિસ્તારમાં સર્ચ ઓપરેશન તેજ કરી દીધું છે. ઘાયલોને બેલા કેમ્પમાં સારવાર આપવામાં આવી રહી છે. હાલ હાઇવે બંધ છે. જો કે, હજુ સુધી પાકિસ્તાની સુરક્ષા દળો તરફથી આ હુમલા અંગે વિગતવાર સત્તાવાર નિવેદન જાહેરમાં બહાર આવ્યું નથી. આવી સ્થિતિમાં મૃતકોની સંખ્યામાં વધારો અથવા ઘટાડો થઈ શકે છે.
તમને જણાવી દઈએ કે લસબેલા N-25 બલૂચિસ્તાનના સૌથી મહત્વપૂર્ણ રસ્તાઓમાંથી એક છે. હાઇવે કરાચીને ક્વેટાથી જોડે છે અને પ્રાંતના અનેક વ્યૂહાત્મક વિસ્તારોમાંથી પસાર થાય છે. સુરક્ષા કાફલો, સામાન્ય મુસાફરો અને કોમર્શિયલ વાહનો પણ આ માર્ગ પરથી પસાર થાય છે. લાસબેલા કરાચીની એકદમ નજીક માનવામાં આવે છે. આ વિસ્તાર દરિયાકાંઠાના માર્ગો અને પશ્ચિમ બલૂચિસ્તાનને બંદર શહેર સાથે જોડતો મહત્વપૂર્ણ વિસ્તાર છે.
આ હુમલો એવા સમયે થયો છે જ્યારે બલૂચિસ્તાનમાં હિંસા વધી હોવાનું કહેવાય છે. તાજેતરના મહિનાઓમાં સુરક્ષા કર્મચારીઓ, ચેકપોઇન્ટ્સ, સરકારી સુવિધાઓ અને રોડવેઝ પર અનેક હુમલાઓ નોંધાયા છે. BLA જેવા સંગઠનો એક કરતા વધુ સ્થળો પર હુમલો કરવાનો અને આગળ વધી રહેલા કાફલાને નિશાન બનાવવાનો દાવો કરી રહ્યાં છે. બલૂચિસ્તાનમાં લાંબા સમયથી હાઈવે પર સુરક્ષા કાફલા પર હુમલાની ઘટનાઓ અવારનવાર બની રહી છે.
