અમદાવાદ-વડોદરા એક્સપ્રેસ વે પર એક ભયાનક અકસ્માત સર્જાયો છે. આ અકસ્માતમાં 2 લોકોના ઘટનાસ્થળે જ મોત થયા હતા. જ્યારે 10 લોકો ઘાયલ થયા છે. ઘાયલોને સારવાર માટે હોસ્પિટલમાં મોકલવામાં આવ્યા છે.
મળતી માહિતી મુજબ, અમદાવાદ-વડોદરા એક્સપ્રેસ વે પર નડિયાદ નજીક એક કાર અને ST બસ વચ્ચે અકસ્માત થયો હતો, જેમાં 2 લોકોના ઘટનાસ્થળે જ મોત થયા હતા. જ્યારે બસમાં સવાર 10 જેટલા લોકો ઘાયલ થયા છે. જેમાંથી 2 લોકોની હાલત ગંભીર હોવાનું કહેવાય છે. બસના ડ્રાઈવર અને કંડક્ટરને પણ માથામાં ઈજા થઈ હતી. પસાર થતા લોકોના જણાવ્યા અનુસાર, કાર અચાનક રોંગ સાઇડમાં વળતાં અકસ્માત સર્જાયો હતો.
આ અકસ્માત બાદ ત્યાંથી પસાર થતા લોકોના ટોળા એકઠા થઈ ગયા હતા. આ અંગે પોલીસને જાણ કરતાં પોલીસ કાફલો પણ ઘટના સ્થળે પહોંચી ગયો હતો. પોલીસ દ્વારા હાઈવે પરનો ટ્રાફિક ક્લિયર કરવામાં આવ્યો હતો અને ઈજાગ્રસ્તોને તાત્કાલિક સારવાર માટે હોસ્પિટલ લઈ જવાના પ્રયાસો હાથ ધરાયા હતા. પોલીસે મૃતદેહોને પોસ્ટમોર્ટમ માટે હોસ્પિટલ મોકલી આપ્યા છે. આથી પોલીસે આ મામલે ગુનો નોંધી વધુ તપાસ હાથ ધરી છે.