(GNS),08
સિંધુભવન રોડ પર સ્પામાં કામ કરતી મહિલાનો વીડિયો વાયરલ થતાં અમદાવાદ શહેર પોલીસ સતર્ક થઈ ગઈ છે. ત્યારે શહેર પોલીસે શહેરના 350 સ્પામાંથી 215 સ્પામાં તપાસ શરૂ કરી હતી. જેમાં 24 સ્પા સામે કાયદેસરની કાર્યવાહી કરવામાં આવી છે. થોડા દિવસો પહેલા સિંધુભવન રોડ પર એક મહિલા સ્પા કર્મચારીને માર મારવામાં આવ્યો હોવાનો વીડિયો વાયરલ થયા બાદ અમદાવાદ શહેર પોલીસ કમિશનરે અમદાવાદ શહેરમાં સ્પા અને મસાજ પાર્લરમાં ચાલતી ગેરકાયદેસર પ્રવૃતિઓને રોકવા માટે નોટિસ ફટકારી છે. જે સંદર્ભે અમદાવાદ શહેરના વિવિધ વિસ્તારોમાં ચાલતા મસાજ પાર્લરો અને સ્પામાં તપાસ હાથ ધરવામાં આવી હતી. રાજ્ય સરકારની કડક સૂચના બાદ અમદાવાદ શહેર પોલીસ દ્વારા આ કાર્યવાહી કરવામાં આવી રહી છે.
જેમાં કુલ 24 સ્પા અને મસાજ સેન્ટરમાં પોલીસ કમિશનરના જાહેરનામા વિરુદ્ધ ફરિયાદો નોંધાઈ છે. આગામી દિવસોમાં પણ શહેર પોલીસ સરપ્રાઇઝ સ્પા અને મસાજ સેન્ટરની તપાસ કરશે. મસાજ સેન્ટરના નામે ચાલતી અનૈતિક પ્રવૃતિના કિસ્સાઓ અનેક વખત પ્રકાશમાં આવ્યા છે, આથી પોલીસે આ અનૈતિક પ્રવૃતિને નાબુદ કરવા કાર્યવાહી હાથ ધરી છે. અમદાવાદ શહેરમાં અંદાજે 350 વધુ મસાજ કેન્દ્રો કાર્યરત છે. જેમાં નિયમાનુસાર કામ કરતા કર્મચારીઓ સિવાય ચોક્કસ રાજ્યની કે રાજ્ય બહારની કે વિદેશની મહિલાઓના ભૂતકાળની જાણ પોલીસ સ્ટેશનમાં કરવાની હોય છે. પરંતુ આવા બનાવોની માહિતી ન આપતા જાહેરનામાના બદલે ફરિયાદ દાખલ કરવામાં આવી છે.