ઇઝરાયેલ હમાસ યુદ્ધ: ઇઝરાયેલ અને હમાસ વચ્ચે સતત આઠમા દિવસે યુદ્ધ ચાલુ છે. દરમિયાન, ઈઝરાયેલી સેનાએ શુક્રવારે ગાઝા શહેરમાં રહેતા લગભગ 10 લાખ લોકોને ત્યાંથી નીકળી જવાની સૂચના આપી હતી. આ પછી ઈઝરાયેલ દ્વારા આ વિસ્તારમાં જમીની કાર્યવાહી કરવામાં આવે તેવી દહેશત વધી ગઈ છે. સાથે જ હમાસે લોકોને પોતાના ઘરમાં રહેવા માટે કહ્યું છે. આ બધા વચ્ચે ભારે ગભરાટ છે. સમાચાર મુજબ ઈઝરાયેલના આદેશ બાદ લોકોએ ઉત્તરીય ભાગ ખાલી કરી દીધો છે અને દક્ષિણ તરફ ભાગવા લાગ્યા છે. જોકે, સંયુક્ત રાષ્ટ્રએ કહ્યું છે કે સમગ્ર વિસ્તારને ખાલી કરાવવો સરળ નથી. આ દરમિયાન લોકોના મનમાં આ સવાલ આવી રહ્યો છે કે શું દુનિયા ત્રીજા વિશ્વ યુદ્ધ તરફ આગળ વધી રહી છે. હકીકતમાં, ઇઝરાયેલ અને હમાસ વચ્ચે ચાલી રહેલા સંઘર્ષને કારણે વિશ્વ ફરી એક વખત બે ભાગમાં વહેંચાયેલું જોવા મળી રહ્યું છે.
આ દરમિયાન અમેરિકાના રાષ્ટ્રપતિ જો બિડેને શુક્રવારે કહ્યું કે પેલેસ્ટિનિયન આતંકવાદી જૂથ હમાસ આતંકવાદી સંગઠન અલ કાયદા કરતાં પણ ખરાબ છે. જો બિડેને ફિલાડેલ્ફિયામાં ‘હાઈડ્રોજન હબ્સ’ ખાતેના તેમના સંબોધનમાં કહ્યું, “આ હુમલા વિશે આપણે જેટલું વધુ જાણીએ છીએ, તે વધુ ભયાનક દેખાય છે.” જ્યાં એક તરફ અમેરિકા ખુલ્લેઆમ ઇઝરાયલનું સમર્થન કરી રહ્યું છે તો બીજી તરફ રશિયા ઇઝરાયલની કાર્યવાહીની નિંદા કરી રહ્યું છે. રશિયાએ આ મામલે કહ્યું છે કે ઈઝરાયેલ દ્વારા બદલો લેવાનું વલણ અપનાવવામાં આવેલું વલણ ક્રૂર છે. તેણે તેની નિંદા પણ કરી છે.