ગાંધીનગર: રાજ્યમાં સરકારી અને અર્ધ-સરકારી કચેરીઓમાં કામ કરતા દૈનિક વેતન કામદારોને લઘુત્તમ વેતનનો ઇનકાર કરવામાં આવી રહ્યો છે, આઉટસોર્સિંગ અને કોન્ટ્રાક્ટ પ્રથામાં ભાજપના ગુંડાઓ દ્વારા કામદારોનું શોષણ કરવામાં આવી રહ્યું છે. દારૂ, જુગારના અડ્ડા બેરોકટોક ધમધમી રહ્યા છે, જેના કારણે મહિલા સુરક્ષાની વાતો પોકળ સાબિત થઈ રહી છે અને આજે સાબરકાંઠાના તલોદ ખાતે કોંગ્રેસ દ્વારા આયોજિત જાહેર સભામાં મહિલાઓની સુરક્ષા માટે રજૂઆત કરવામાં આવી હતી. વિધાનસભામાં કોંગ્રેસ પક્ષના નેતા અમિત ચાવડાએ જણાવ્યું હતું કે જનમંચ દ્વારા સામાન્ય લોકોના પ્રશ્નો, સમસ્યાઓ અને ફરિયાદોના પરિણામલક્ષી ઉકેલ માટે અમે વિધાનસભાથી વિધાનસભા સુધી લડીશું.
તલોદમાં જનમંચના કાર્યક્રમમાં યુવાનો, મહિલાઓ, વેપારીઓ, ખેડૂતો, પીડિતો, વંચિતો, શોષિતોએ પોતાની સમસ્યાઓ રજુ કરી જણાવ્યું હતું કે તલોદ નગરપાલિકાના અનેક વિસ્તારોમાં લોકો પાકા રસ્તા, સ્વચ્છ પાણી, ગટર વ્યવસ્થા જેવી પ્રાથમિક સુવિધાઓથી વંચિત છે. ટેક્સ ભરવા છતાં સુવિધાના નામ પર ગંદકી છે. દારૂ, જુગારના અડ્ડા બેરોકટોક ફૂલીફાલી રહ્યા છે, મહિલા સુરક્ષાની વાતો પોકળ સાબિત થઈ રહી છે અને મહિલાઓને કોઈ સુરક્ષા નથી, સ્થાનિક લોકોની માંગ છે કે ગ્રામ્ય વિસ્તારોમાં પીવાના પાણી અને સિંચાઈ માટે તળાવો ભરવામાં આવે, નર્મદાનું પાણી પણ આવતું નથી.
આ ઉપરાંત પ્રાથમિક શાળાઓમાં બાળકોને પીવાનું પાણી અને સ્વચ્છતાની સુવિધા મળતી નથી, પોલીસ અને વહીવટીતંત્રની મિલીભગતથી જમીન પર બળજબરીથી કબજો કરવામાં આવી રહ્યો છે, કાયદો અને વ્યવસ્થાની કોઈ નિશાની નથી. કઠોળ, શાકભાજી, કરિયાણું, દૂધ વગેરેના ભાવ આસમાને છે, જનતા મોંઘવારીથી ત્રસ્ત છે, ગૃહિણીઓ માસિક બજેટથી ઘર ચલાવવાની ચિંતામાં છે. પોલીસ દ્વારા લારી-ગલ્લાના નાના વેપારીઓની હેરાનગતિથી વેપારીઓમાં ડરના કારણે લોકો ધંધો કરવા મજબૂર બન્યા છે.