મુંબઈઃ ભારતમાં ગ્રાહકોનો વિશ્વાસ હાલમાં ચાર વર્ષની ટોચે છે. રિઝર્વ બેંક દ્વારા હાથ ધરવામાં આવેલા સર્વેક્ષણમાં અર્થતંત્ર અને રોજગારની સામાન્ય સ્થિતિ અંગેના સેન્ટિમેન્ટમાં સુધારો દર્શાવવામાં આવ્યો છે, જેમાં વર્તમાન આર્થિક સ્થિતિમાં સતત સુધારો થઈ રહ્યો છે.
ભાવિ અપેક્ષા સૂચકાંક, જે આગામી 12 મહિના માટે ગ્રાહક સેન્ટિમેન્ટની આગાહી પૂરી પાડે છે, તે પણ 2019ના મધ્યભાગથી સુધર્યો છે, સર્વે રિપોર્ટમાં જણાવાયું છે.
નાણાકીય વર્ષ 2024-25માં દેશનો આર્થિક વિકાસ દર 7 ટકા રહેવાનો અંદાજ છે, રિઝર્વ બેન્કે તેની નાણાકીય નીતિ સમીક્ષામાં જણાવ્યું છે.
અન્ય એક અહેવાલમાં જણાવાયું છે કે ગ્રાહકો પણ માને છે કે ફુગાવો વર્તમાન સ્તરોથી આગળ જતાં નીચે જશે. મેન્યુફેક્ચરિંગ સેક્ટરમાં ક્ષમતા વપરાશનું સ્તર સપ્ટેમ્બર ક્વાર્ટરમાં 74 ટકાથી વધીને ડિસેમ્બર 2023 ક્વાર્ટરમાં 74.70 ટકા થયું છે.
આરબીઆઈના ગવર્નર શક્તિકાંત દાસે નાણાકીય નીતિ સમીક્ષા બેઠક બાદ જણાવ્યું હતું કે ખાનગી મૂડી ખર્ચ ચક્રમાં સુધારો થઈ રહ્યો છે અને રોકાણ પ્રવૃત્તિ માટેનો દૃષ્ટિકોણ ઉજ્જવળ દેખાય છે.