એપલે ભારતમાંથી સૌથી મોટા સ્માર્ટફોન નિકાસકાર તરીકે સેમસંગને પાછળ છોડી દીધું છે. એક મીડિયા રિપોર્ટ અનુસાર, જૂન ક્વાર્ટરમાં ભારતમાંથી કુલ 12 મિલિયન સ્માર્ટફોન એક્સપોર્ટમાં Appleનો હિસ્સો 49 ટકા હતો. જ્યારે સેમસંગનો હિસ્સો 45 ટકા જોવા મળ્યો હતો. નોંધનીય છે કે ક્યુપરટિનો સ્થિત કંપનીએ ગયા વર્ષે એપ્રિલથી જૂન વચ્ચે ભારતીય સ્માર્ટ ફેનની નિકાસમાં માત્ર 9 ટકાનું યોગદાન આપ્યું હતું. હવે, વોલ્યુમની દ્રષ્ટિએ તે દેશમાંથી થતી નિકાસમાં અડધો હિસ્સો ધરાવે છે. Apple પહેલાથી જ તેના પ્રીમિયમ અને સુપર પ્રીમિયમ સેગમેન્ટને કારણે મૂલ્યની દ્રષ્ટિએ સૌથી મોટા નિકાસકારનું ટૅગ મેળવી ચૂક્યું છે.
Apple ભારતમાં ત્રણ કોન્ટ્રાક્ટ ઉત્પાદકો હેઠળ iPhones બનાવે છે. તેના કોન્ટ્રાક્ટ ઉત્પાદકોમાં ફોક્સકોન, વિસ્ટ્રોન અને પેગાટ્રોનનો સમાવેશ થાય છે. તેણે ભારતમાં વધતા બજાર હિસ્સા તેમજ નિકાસને ધ્યાનમાં રાખીને iPhone 14 અને તેનાથી નીચેના મોડલનું ઉત્પાદન શરૂ કર્યું. ફોક્સકોને તેના ચેન્નાઈ પ્લાન્ટમાં નવા લોન્ચ થયેલા iPhone 15નું ઉત્પાદન પણ શરૂ કરી દીધું છે. ભારતીય બનાવટના આ એકમોનું વેચાણ શુક્રવારથી શરૂ થયું છે. રિપોર્ટ અનુસાર, કંપની આ જ પ્લાન્ટમાં iPhone 15 Plus મોડલનું ઉત્પાદન પણ શરૂ કરશે. વધુમાં, આ ત્રણ ઉત્પાદકો કેન્દ્ર સરકાર દ્વારા શરૂ કરવામાં આવેલી પ્રોડક્શન-લિંક્ડ-ઇન્સેન્ટિવ (PLI) સ્કીમનો ભાગ છે. દેશમાંથી સેમસંગની નિકાસમાં ઘટાડાનું કારણ કંપનીનું વિયેતનામ પર ફોકસ હોવાનું માનવામાં આવે છે. કંપનીની સૌથી મોટી સ્માર્ટફોન ફેક્ટરી ઉત્તર વિયેતનામમાં આવેલી છે. સેમસંગની નિકાસ ગયા વર્ષના એપ્રિલ-જૂન સમયગાળામાં 84 ટકાની સરખામણીએ આ વર્ષે સમાન સમયગાળામાં ઘટીને 45 ટકા થઈ ગઈ છે. બીજી તરફ એપલ ચીનથી દૂર તેના ઉત્પાદનમાં વિવિધતા લાવવા પર ધ્યાન કેન્દ્રિત કરી રહી છે. તે ટૂંક સમયમાં ભારતમાં iPodsનું ઉત્પાદન શરૂ કરી શકે છે. એપલે ભારતમાં 2017માં આઈફોનનું ઉત્પાદન શરૂ કર્યું હતું. ગયા નાણાકીય વર્ષમાં, તેણે ભારતમાં ફોનના કુલ વૈશ્વિક ઉત્પાદનના સાત ટકાનો હિસ્સો બનાવ્યો હતો. 2025 સુધીમાં તેને 25 ટકા સુધી લઈ જવાની યોજના છે.