નાગપુર. મહારાષ્ટ્રના નાગપુરમાં ઓનલાઈન ગેમિંગ દ્વારા 58 કરોડ રૂપિયાની છેતરપિંડીનો મામલો સામે આવ્યો છે. જ્યારે નાગપુર સાયબર પોલીસે આ મામલે કાર્યવાહી કરી ત્યારે આરોપીના ઘરેથી 10 કરોડ રૂપિયાની રોકડ અને ઘરેણાં મળી આવ્યા હતા. રોકડ ગણવા માટે પોલીસે સ્થળ પર કેશ કાઉન્ટીંગ મશીન મંગાવ્યું હતું. મામલાની ગંભીરતાને જોતા પોલીસે સાયબર અને ક્રાઈમ વિભાગની વિશેષ ટીમ બનાવી છે.
નાગપુરના પોલીસ કમિશનર અમિતેશ કુમારે જણાવ્યું હતું કે એક વ્યક્તિએ ઓનલાઈન ગેમિંગ એપ દ્વારા 58 કરોડ રૂપિયાની છેતરપિંડી થઈ હોવાની પોલીસને ફરિયાદ કરી હતી. ફરિયાદીના જણાવ્યા મુજબ, આરોપીએ એક એપ દ્વારા છેતરપિંડી કરી હતી. આ અંગે ફરિયાદીને જાણ થતાં તેણે તેના પૈસા પરત માંગ્યા હતા. જોકે, આરોપીઓએ ધમકીઓ આપવાનું શરૂ કર્યું હતું.
પોલીસના જણાવ્યા અનુસાર, ફરિયાદ મળ્યા બાદ, પ્રાથમિક તપાસમાં તથ્યો સાચા જણાતા, પોલીસે ગોંદિયામાં ઠગના ઘરે દરોડો પાડ્યો અને તેના ઘરમાંથી 10 કરોડ રૂપિયા રોકડા મળી આવ્યા. જે બાદ પોલીસે નોટ ગણવાનું મશીન મંગાવ્યું અને આ રકમની ગણતરી કરી.
અમિતેશ કુમારે જણાવ્યું કે ગોંદિયા નિવાસી આરોપી અનંત ઉર્ફે સોન્ટુ નવરતન જૈને તેના સાથીદારો સાથે મળીને ફરિયાદીને 24 કલાક ઓનલાઈન ગેમિંગ પર સટ્ટો લગાવીને કરોડો રૂપિયા કમાવવાની લાલચ આપી હતી. તેણે જણાવ્યું કે હાલ આરોપી બુકી ફરાર છે.
નાગપુર સાયબર પોલીસે આ મામલે કલમ 420, 468, 386, 120 (b), 66 (e) અને ઇન્ફોર્મેશન ટેક્નોલોજી એક્ટ હેઠળ કેસ નોંધ્યો છે. મામલાની ઝીણવટભરી તપાસ માટે સાયબર અને ક્રાઈમ વિભાગની વિશેષ ટીમની રચના કરવામાં આવી છે.
પોલીસે જણાવ્યું કે આરોપીના ઘરેથી લગભગ 10 કરોડ રૂપિયા રોકડા, સોનાના બિસ્કિટ અને અન્ય દસ્તાવેજો મળી આવ્યા છે.