(GNS),03
સુપ્રીમ કોર્ટે ગુજરાતના પૂર્વ IPS અધિકારી સંજીવ ભટ્ટ દ્વારા દાખલ કરવામાં આવેલી ત્રણ અરજીઓને દંડ સાથે ફગાવી દીધી છે. જસ્ટિસ વિક્રમ નાથની અધ્યક્ષતાવાળી બેન્ચે દરેકને 1 લાખ રૂપિયાનો દંડ ફટકારીને સંજીવ ભટ્ટની ત્રણ અરજીઓ ફગાવી દેવી પડી હતી. કોર્ટે સંજીવ ભટ્ટને ફટકાર લગાવતા કહ્યું કે, તમે સુપ્રીમ કોર્ટમાં કેટલી વાર આવ્યા છો? તમે ઓછામાં ઓછા એક ડઝન વખત કોર્ટમાં ગયા છો? કોર્ટે કહ્યું કે, ગત વખતે પણ તમારી એક અરજી પર સુપ્રીમ કોર્ટે 10,000 રૂપિયાનો દંડ ફટકાર્યો હતો. સુપ્રીમ કોર્ટે એમ પણ પૂછ્યું કે શું તમે ઈચ્છો છો કે તમારા માટે કોઈ વિશેષ આદેશ જારી કરવામાં આવે? જો કે, ભટ્ટના પક્ષે સુપ્રીમ કોર્ટ દ્વારા લાદવામાં આવેલ દંડ ઘટાડવાની વિનંતી કરી હતી. કોર્ટે ના પાડી દીધી અને કહ્યું કે 3 લાખ રૂપિયાનો દંડ ગુજરાત હાઈકોર્ટ એડવોકેટ એસોસિએશનના ખાતામાં જમા કરાવો.
હકીકતમાં, ડ્રગ જપ્તીના કેસમાં, ગુજરાતના ભૂતપૂર્વ IPS અધિકારી સંજીવ ભટ્ટ દ્વારા ભેદભાવનો આક્ષેપ કરતી ત્રણ અરજીઓ સુપ્રીમ કોર્ટમાં દાખલ કરવામાં આવી હતી. જેમાં વહીવટી આદેશોનું પાલન થતું ન હોવાનું જણાવાયું હતું. આ ઉપરાંત તેમણે ગુજરાત હાઈકોર્ટની ટિપ્પણી સામે વાંધો ઉઠાવ્યો હતો. જેમાં ભટ્ટે કેસમાં વિલંબ થતો હોવાનું જણાવ્યું હતું. મહત્વનું છે કે, આ ડ્રગ પ્લાન્ટનો મામલો 1996નો છે. સંજીવ ભટ્ટ તે સમયે બનાસકાંઠાના એસપી હતા. પોલીસે પાલનપુરની એક હોટલમાંથી રાજસ્થાનના રહેવાસી સમરસિંગ રાજપુરોહિતની ધરપકડ કરી હતી. આરોપ છે કે તેની પાસેથી ડ્રગ્સ મળી આવ્યું હતું. પરંતુ રાજસ્થાન પોલીસે કહ્યું હતું કે સમરસિંગને રાજસ્થાનના પાલીમાં વિવાદિત જમીન ટ્રાન્સફર ન કરવા બદલ ગુજરાત પોલીસે ફસાવ્યો હતો. આ બાબતને કોર્ટમાં પડકારવામાં આવી હતી. મામલો આગળ વધતાં સુપ્રીમ કોર્ટમાં પહોંચ્યો અને આજે સુપ્રીમ કોર્ટે આ અરજીને ફગાવી દીધી છે.