પાલનપુર તાલુકાના ગઢ ગામે વીજ પોલ પર વીજ લાઇન રીપેર કરી રહેલ વીજ કર્મચારી પોલ પરથી લપસીને પડી ગયો હતો. માથામાં ગંભીર ઈજા થતાં તેને હોસ્પિટલ લઈ જવામાં આવ્યો હતો. જ્યાં તેનું મોત નીપજતાં મૃતકના મૃતદેહને પીએમ અર્થે પાલનપુરની સિવિલ હોસ્પિટલમાં ખસેડાયો હતો. પાલનપુર તાલુકાના ગઢ ખાતે ઉત્તર ગુજરાત વીજ કંપનીમાં હેલ્પર તરીકે ફરજ બજાવતા રમણલાલ કાવજીભાઇ મોડીયા નામના વીજ કર્મચારી ગઢ ગામની સીમમાં આવેલ ખેતર વિસ્તારમાં વીજ પોલ પર વીજ લાઇન રીપેરીંગ કરી રહ્યા હતા. દરમિયાન અચાનક તેનો પગ થાંભલા પરથી લપસી જતાં તે થાંભલાની નીચે જમીન પર પટકાયો હતો જેને કારણે માથામાં ગંભીર ઈજાઓ પહોંચી હતી. જ્યાં ફરજ પરના તબીબે ઇજાગ્રસ્તને મૃત જાહેર કરતાં મૃતકની લાશને પાલનપુર સિવિલ હોસ્પિટલ ખાતે પીએમ અર્થે ખસેડવામાં આવી હતી. બાદમાં મૃતદેહ તેના પરિવારજનોને સોંપવામાં આવ્યો હતો. જોકે, ફરજ પરના ઇલેક્ટ્રિશિયનનું મોત થતાં યુજીવીસીએલના ગઢમાં શોક પ્રસરી ગયો હતો.