આ પ્રદર્શન 18 થી 21 જાન્યુઆરી દરમિયાન હેલીપેડ સેન્ટર ગાંધીનગર ખાતે યોજાશે.
આ પ્રદર્શનમાં 700 થી વધુ વિવિધ પ્રકારના વ્યવસાયો, ઉત્પાદનો, સેવાઓ અને સ્ટાર્ટઅપ્સના સ્ટોલ જોવા મળશે.
(GNS),તા.06
ગાંધીનગરમાં લોહાણા ઈન્ટરનેશનલ બિઝનેસ ફોરમ દ્વારા બીજા એક્ઝિબિશનનું આયોજન કરવામાં આવ્યું છે. આ પ્રદર્શન 18 થી 21 જાન્યુઆરી દરમિયાન હેલીપેડ સેન્ટર ગાંધીનગર ખાતે યોજાશે. આ પ્રદર્શનમાં 700 થી વધુ વિવિધ પ્રકારના વ્યવસાયો, ઉત્પાદનો, સેવાઓ અને સ્ટાર્ટઅપ્સના સ્ટોલ જોવા મળશે.
શ્રી લોહાણા મહા પરિષદ દ્વારા “લોહાણા ઈન્ટરનેશનલ બિઝનેસ ફોરમ” ની રચના સમુદાયના સભ્યોને તેમના વ્યવસાય, ઉત્પાદનો અને સેવાઓને યોગ્ય રીતે પ્રમોટ કરવાની તક પૂરી પાડવાના ઉદ્દેશ્ય સાથે કરવામાં આવી છે. આ અંતર્ગત ગત વર્ષે યુગાન્ડા (આફ્રિકા) ખાતે સૌપ્રથમ વૈશ્વિક પ્રદર્શનનું સફળતાપૂર્વક આયોજન કરવામાં આવ્યું હતું, જેમાં 22 દેશોમાં વસતા લોહાણા ભાઈ-બહેનોએ ભારે ઉત્સાહભેર ભાગ લીધો હતો. આ ઉપરાંત અનેક જ્ઞાતિબંધુઓને સારી તકો મળી.
આ અંગે વાત કરતા લોહાણા મહા પરિષદના પ્રમુખ સતીષભાઈ વિઠ્ઠલાણીએ જણાવ્યું હતું કે, ગાંધીનગરમાં લોહાણા ઈન્ટરનેશનલ બિઝનેસ ફોરમ દ્વારા હેલીપેડ સેન્ટર ગાંધીનગર ખાતે દ્વિતીય પ્રદર્શનનું આયોજન કરવામાં આવ્યું છે. લોહાણા સમાજના તમામ લોકોને સામેલ કરીને આ પ્રદર્શનનું આયોજન કરવામાં આવ્યું છે. આ ઈવેન્ટનું આયોજન કરતા પહેલા અમે જામનગરમાં એક મીટીંગનું પણ આયોજન કર્યું હતું, જેના કારણે અમે લોહાણા સમાજના દરેક વ્યક્તિ સુધી આ પ્રદર્શનની વાત પહોંચાડી રહ્યા છીએ. ગાંધીનગરમાં આયોજિત આ પ્રદર્શનમાં કુલ પાંચ ડોમ બનાવવામાં આવ્યા છે. જેમાં વિવિધ પ્રકારના બિઝનેસ, પ્રોડક્ટ્સ, સર્વિસ અને સ્ટાર્ટઅપ માટે 700થી વધુ સ્ટોલ બનાવવામાં આવશે. આ પ્રદર્શનમાં દેશ-વિદેશમાંથી મોટી સંખ્યામાં લોહાણા ભાઈ-બહેનો ભાગ લેશે તેવી અપેક્ષા છે. આ પ્રદર્શનનો ઉદ્દેશ્ય આપણા દેશના લોકોને તેમના વ્યવસાય, ઉત્પાદનો અને સેવાઓ માટે વૈશ્વિક પ્લેટફોર્મ પૂરું પાડવાનો છે.
તેમણે વધુમાં જણાવ્યું હતું કે, લોહાણા સમાજના યુવા ભાઈ-બહેનોમાં ખૂબ જ પ્રતિભાશાળી છે. ગુજરાત ઉપરાંત આજે વિશ્વના તમામ દેશોમાં લોહાણા સમાજના લોકો વસે છે. લોહાણા સમાજના 1 હજારથી વધુ દિકરી અને દિકરાઓએ સીએની ડીગ્રી ધરાવે છે, જેનું સમગ્ર લોહાણા સમાજને ખૂબ જ ગર્વ છે.