(GNS),તા.23
ગાંધીનગર,
રાજ્યભરના ખેડૂતોને રવિ સિઝન દરમિયાન રવિ પાક અંગેની આધુનિક કૃષિ ટેકનોલોજીનું માર્ગદર્શન મળી રહે અને વિવિધ કૃષિ સહાયક યોજનાઓ વિશે સમજણ મળી રહે તે હેતુથી રાજ્યભરમાં આજથી બે દિવસીય રવિ કૃષિ મહોત્સવનો પ્રારંભ થઈ રહ્યો છે. 24 અને 25 નવેમ્બરના રોજ યોજાનાર રવિ કૃષિ મહોત્સવ દરમિયાન ગાંધીનગર જિલ્લાના ખેડૂતોને રવિ સિઝનના રવિ પાકો વિશે આધુનિક ખેતીની રસપ્રદ માહિતી કૃષિ તજજ્ઞો દ્વારા આપવામાં આવશે. આ બે દિવસ દરમિયાન કૃષિ પરિસંવાદ અને કૃષિ પ્રદર્શનનું પણ ખાસ આયોજન કરવામાં આવ્યું છે. આ સાથે સેવા સેતુ કાર્યક્રમનું પણ આયોજન કરવામાં આવનાર છે.
ગાંધીનગર જિલ્લામાં 24મી નવેમ્બરથી રવિ કૃષિ મહોત્સવનો પ્રારંભ થઈ રહ્યો છે. જેમાં માણસા તાલુકાના ગ્રામભારતી અમરાપુર, દહેગામ તાલુકાના ઔડા ઓડિટોરિયમ હોલ, ગાંધીનગર તાલુકાની શારીરિક શિક્ષણ રમતગમત શાળા, સાદરા ખાતેની ગુજરાત વિદ્યાપીઠ અને કલોલ તાલુકાના કડવા પાટીદાર 42 સમાજની વાડી કલોલ-માણસા હાઇવે ભંડોલ ખાતે રવિ કૃષિ મહોત્સવનું આયોજન કરવામાં આવશે.
ગાંધીનગર જિલ્લા કલેક્ટર શ્રી હિતેશ કોયા અને જિલ્લા વિકાસ અધિકારી શ્રી સુરભી ગૌતમના માર્ગદર્શન હેઠળ સમગ્ર વહીવટી તંત્ર દ્વારા ગાંધીનગર જિલ્લામાં રવિ કૃષિ મહોત્સવનું સુંદર આયોજન કરવામાં આવ્યું છે.