(GNS),10
ગુજરાતમાં ચોમાસાના આગમન સાથે મેઘરાજાએ અવિરતપણે મહેરબાની કરી હતી. આ સાથે ગુજરાતના 26 જેટલા જળાશયો 100 ટકા પાણીથી ભરાઈ ગયા છે. ગુજરાતના 37 જળાશયો હાઈ એલર્ટ પર છે. તો 13 જળાશયો એલર્ટ પર છે. તો 15 જળાશયો ચેતવણી પર છે. જો ગુજરાતના જળાશયોમાં પાણીની સ્થિતિની વાત કરીએ તો ઉત્તર ગુજરાતના 15 જળાશયો કુલ સંગ્રહના 52.85 ટકા પાણીથી ભરેલા છે. તો મધ્ય ગુજરાતના 17 જળાશયોમાંથી 29.78 ટકા ભરાયા છે. દક્ષિણ ગુજરાતના 13 ડેમ 35.57 ટકા પાણીથી ભરાયા છે. જેમાંથી એક ડેમ સંપૂર્ણપણે 100 ટકા ભરાઈ ગયો છે. કચ્છના 20 જળાશયોમાંથી 63.70 ટકા ભરાઈ ગયા છે. જેમાંથી 7 ડેમ સંપૂર્ણ રીતે ભરાઈ ગયા છે. સૌરાષ્ટ્રના 141 જળાશયો 57.56 ટકા પાણીથી ભરાયા છે. જેમાંથી 18 ડેમ સંપૂર્ણ રીતે ભરાઈ ગયા છે. જો સરદાર સરોવર નર્મદા ડેમની વાત કરીએ તો તેની પાણીની ક્ષમતા 58.08 ટકા ભરાઈ ગઈ છે. ગુજરાતમાં અત્યાર સુધીમાં કચ્છમાં સિઝનનો સૌથી વધુ 112.7 ટકા વરસાદ નોંધાયો છે. ઉત્તર ગુજરાતમાં 45.24 ટકા વરસાદ નોંધાયો છે. તો પૂર્વ મધ્ય ગુજરાતમાં 30.16 ટકા, સૌરાષ્ટ્રમાં 63.14 ટકા અને દક્ષિણ ગુજરાતમાં સિઝનનો 32.36 ટકા વરસાદ નોંધાયો છે. આમ સમગ્ર ગુજરાતમાં અત્યાર સુધીમાં 43.77 ટકા વરસાદ નોંધાયો છે. હવામાન વિભાગની આગાહી મુજબ ગુજરાતના અનેક વિસ્તારોમાં ભારે વરસાદ પડી રહ્યો છે. રાજ્યભરમાં છેલ્લા 24 કલાકમાં 33 તાલુકાઓમાં વરસાદ થયો છે. છેલ્લા 24 કલાકમાં ગુજરાતના 245 તાલુકાઓમાં મેઘમહેર જોવા મળી છે. ગુજરાતમાં 106 તાલુકાઓમાં 2 ઈંચથી લઈને 1.25 ઈંચ સુધીનો વરસાદ નોંધાયો છે. પાટણના સાંતલપુરમાં સૌથી વધુ 6.5 ઈંચ વરસાદ નોંધાયો હતો. તો કોટડાસાંગાણી અને માણસામાં 6-6 ઈંચ વરસાદ નોંધાયો છે. અબડાસા, સુઇગામ, ખંભાળિયા, ઉપલેટામાં 5-5 ઇંચ વરસાદ નોંધાયો છે. તો દહેગામ, વંથલી, તલોદમાણમાં 4-4 ઈંચ વરસાદ નોંધાયો હતો.