મુંબઈઃ દેશમાં ચાલી રહેલી લોકસભાની ચૂંટણી અને રવિ સિઝનના પાકની લણણીના પરિણામે એપ્રિલ-જૂન સમયગાળા દરમિયાન ડીઝલની માંગમાં દરરોજ 75,000 બેરલનો વધારો થવાની ધારણા છે. એક રિપોર્ટ અનુસાર 2024ના પ્રથમ ત્રિમાસિક ગાળામાં ડીઝલની માંગમાં 60,000 બેરલનો વધારો થયો છે.
S&P ગ્લોબલ કોમોડિટી ઈનસાઈટ્સના અહેવાલ અનુસાર, ફેબ્રુઆરીમાં તેલ ઉત્પાદનોની માંગમાં પ્રતિ દિવસ 1.32 લાખ બેરલનો વધારો થયો છે, જે ગયા વર્ષના ફેબ્રુઆરી કરતાં 2.40 ટકા વધુ છે.
ઉત્તર ભારતમાં વધતી ઠંડીને કારણે ફેબ્રુઆરીમાં એલપીજી અને ડીઝલની માંગમાં વાર્ષિક ધોરણે સૌથી વધુ વધારો જોવા મળ્યો હતો. ટ્રાફિક વધવાને કારણે ડીઝલનો વપરાશ પણ વધ્યો છે.
ડીઝલનો વપરાશ ફેબ્રુઆરીમાં વાર્ષિક ધોરણે 2.60 ટકા વધ્યો છે. અહેવાલમાં જણાવવામાં આવ્યું છે કે જેમ જેમ ઠંડી ઓછી થઈ છે તેમ તેમ ઔદ્યોગિક અને બાંધકામ ક્ષેત્રે ગતિવિધિઓ વધી છે, જેના કારણે ગેસોલિનના વપરાશમાં પણ વધારો થયો છે.
આગામી લોકસભા ચૂંટણી દરમિયાન ચૂંટણી સંબંધિત પ્રવૃત્તિઓ માટે વાહનોની અવરજવર વધવાની સાથે ડીઝલનો વપરાશ પણ વધશે. 2024માં ભારતની તેલની માંગમાં દરરોજ 206,000 બેરલનો વધારો થવાની ધારણા છે.
દરમિયાન, અન્ય એક અહેવાલ મુજબ, રશિયન તેલ પરના ડિસ્કાઉન્ટમાં ઘટાડો અને પ્રતિબંધોમાં વધારો થવા છતાં રશિયામાંથી ભારતની ક્રૂડ ઓઈલની આયાતનું પ્રમાણ જુલાઈ સુધી સ્થિર રહેવાની શક્યતા છે. રશિયન ક્રૂડની માંગ ઊંચી રહે છે અને ભારતીય ઓઇલ રિફાઇનરીઓ આયાતમાં ઘટાડો કરે તેવી શક્યતા નથી. હાજર તેની પાછળનું કારણ પણ લોકસભાની ચૂંટણી હોવાનું માનવામાં આવે છે.