જામનગર: રાજ્યના વિવિધ શહેરોમાં ફાસ્ટ ફૂડમાંથી વિવિધ પ્રકારના રજકણો નીકળવાના બનાવો પ્રકાશમાં આવી રહ્યા છે. હવે જામનગરમાં પ્રખ્યાત પીઝા બ્રાન્ડ ડોમિનોઝના પીઝામાંથી માખીઓ નીકળતી હોવાની ઘટના પ્રકાશમાં આવી છે. જામનગરમાં ગ્રાહકે મંગાવેલા પિત્ઝામાંથી માખી નીકળી હતી. જે બાદ એક જાગૃત નાગરિકે તેનો વીડિયો બનાવીને વાયરલ કર્યો હતો.
પ્રાપ્ત વિગતો મુજબ નાગનાથ ગેટ પાસે રહેતા કપિલ સોઢા નામના યુવકે પીઝાનો ઓર્ડર આપ્યો હતો. પિઝામાંથી એક માખી નીકળી. આ પછી યુવકે રાત્રે ડોમિનોઝ પિઝાનો સંપર્ક કર્યો. પરંતુ કોઇ જવાબ ન મળતા આખરે યુવકે સવારે પાલિકાની ફૂડ શાખાનો સંપર્ક કરી ફરિયાદ કરી હતી. સમગ્ર મામલે ફરિયાદ મળતા જ મહાનગરપાલિકાની ફૂડ શાખાએ ડોમિનોઝ પિઝામાં ચેકિંગની કાર્યવાહી હાથ ધરી હતી. તેમજ તપાસ બાદ મ્યુનિસિપલ કોર્પોરેશનની ટીમે ડોમિનો શાખાને રૂ.10,000નો દંડ ફટકાર્યો હતો.
અગાઉ જામનગરમાં બ્રાન્ડેડ કંપનીના પીઝામાંથી વંદો નીકળ્યો હતો. તેની સામે કડક કાર્યવાહી કરવામાં આવી હતી. હવે એવું લાગે છે કે ડોમિનોઝ પિઝા ખાનારા લોકોના સ્વાસ્થ્ય સાથે ચેડા કરવામાં આવી રહ્યા છે. પીઝાનો ઓર્ડર આપનાર કપિલ સોઢાએ જણાવ્યું કે અમે ડોમિનોઝ પાસેથી ચાર પિઝા મંગાવ્યા હતા. વળી, અમે જમવા બેઠા ત્યારે આ પીઝામાંથી માખી નીકળી. અમે તરત જ ડોમિનોનો સંપર્ક કરવાનો પ્રયાસ કર્યો. પરંતુ અમારો કોલ કોઈએ ઉપાડ્યો નહીં. તેથી અમે ગઈકાલે રાત્રે જ ડોમિનોના ફીડબેકમાં ફરિયાદ કરી હતી. પરંતુ હજુ સુધી કોઈ જવાબ મળ્યો નથી. જે બાદ આખરે અમે મહાનગર પાલિકાના ફૂડ વિભાગનો સંપર્ક કરી તપાસની માંગણી કરી હતી.