આજે ડીસા-ધાનેરા રોડ પર ઓવરટેક કરવા જઈ રહેલી કાર અને ટ્રક વચ્ચે અકસ્માતનો કિસ્સો પ્રકાશમાં આવ્યો છે. આ અકસ્માતમાં કારમાં મુસાફરી કરી રહેલા ચાર લોકો ઘાયલ થયા હતા, જેમને સારવાર માટે 108 એમ્બ્યુલન્સ વાન મારફતે ડીસાની સરકારી હોસ્પિટલમાં દાખલ કરવામાં આવ્યા હતા. ડીસામાં છેલ્લા 15 દિવસથી અકસ્માતોની હારમાળા ચાલી રહી છે. આજે વધુ એક અકસ્માત ડીસા-ધાનેરા રોડ પર થયો હતો. કારમાં સવાર ચાર લોકો ડીસાથી ધાનેરા જઈ રહ્યા હતા અને ટેટોડા ગામ નજીકથી પસાર થઈ રહ્યા હતા. ત્યારે સામેથી આવતી કારને ઓવરટેક કરવાનો પ્રયાસ કરતી વખતે ટ્રક અને કાર વચ્ચે ટક્કર થઈ હતી. કાર સામેથી આવી રહેલા ટ્રકની પાછળના ભાગ સાથે અથડાઈ હતી અને રોડની સાઈડમાં પટકાઈ હતી.
અચાનક થયેલા અકસ્માતમાં કારના એક સાઈડના ટુકડા થઈ ગયા હતા. આ અકસ્માતમાં કારમાં મુસાફરી કરી રહેલા ચાર લોકો ગંભીર રીતે ઘાયલ થયા હતા. ઘટના બાદ અનેક 108 એમ્બ્યુલન્સ વાનની ટીમ ઘટનાસ્થળે પહોંચી હતી અને ચાર ઘાયલોને ડીસાની સરકારી હોસ્પિટલમાં સારવાર માટે દાખલ કર્યા હતા. બનાવની જાણ થતા ડીસા તાલુકા પોલીસ પણ ઘટના સ્થળે પહોંચી આગળની કાર્યવાહી હાથ ધરી હતી.