તાઈપેઈ, તાઈવાનના પૂર્વ ભાગમાં જોરદાર ભૂકંપ આવ્યો છે. યુનાઈટેડ સ્ટેટ્સ જીઓલોજિકલ સર્વે (યુએસજીએસ) એ જણાવ્યું હતું કે ભૂકંપની તીવ્રતા 7.4 હતી, તેનું કેન્દ્ર તાઈવાનના હુઆલીન શહેરથી 18 કિલોમીટર (11 માઈલ) દક્ષિણમાં 34.8 કિલોમીટરની ઊંડાઈએ હતું. જાપાનની હવામાન એજન્સીએ ભૂકંપની તીવ્રતા 7.5 દર્શાવી છે.
તાઈવાનમાં આવેલો ભૂકંપ એટલો જોરદાર હતો કે તેનાથી જાપાનના દક્ષિણી ટાપુઓ ખરાબ રીતે હચમચી ગયા હતા. આ ભૂકંપના કારણે જાપાનના દક્ષિણી ટાપુ પર મોટી તબાહી સર્જાઈ છે. અહીં ઘણી ઇમારતો તોડી પાડવામાં આવી હતી. છેક જાપાન અને ફિલિપાઈન્સમાં ભૂકંપના આંચકા અનુભવાયા હતા.
હવામાન વિભાગના જણાવ્યા અનુસાર પૂર્વ તાઈવાનના હુઆલીન શહેરમાં ભૂકંપ આવ્યો હતો. તેનું કેન્દ્ર પૃથ્વીથી 34 કિલોમીટર નીચે હતું. ભારતીય સમય અનુસાર સવારે 5:30 વાગ્યે ભૂકંપના આંચકા અનુભવાયા હતા. ઘણી ઇમારતો ધરાશાયી થઈ ગઈ હતી, લેન્ડ સ્લાઈડ પણ થઈ હતી.
તાઈવાનના સેન્ટ્રલ વેધર બ્યુરોના જણાવ્યા અનુસાર, 25 વર્ષમાં તાઈવાનમાં આવેલો આ સૌથી મજબૂત ભૂકંપ છે. આ પહેલા 1999માં 7.6ની તીવ્રતાનો ભૂકંપ આવ્યો હતો. ત્યારે 2 હજારથી વધુ લોકોના મોત થયા હતા. આ ભૂકંપમાં કેટલા લોકોના મોત થયા તેની કોઈ સ્પષ્ટ માહિતી નથી.