હવામાન વિભાગે ગુજરાતમાં 4 દિવસ સુધી ભારે વરસાદની આગાહી કરી છે. ગઈકાલે સવારે 6 વાગ્યાથી આજે સવારે 6 વાગ્યા સુધી એટલે કે 24 કલાકમાં રાજ્યના 126 તાલુકાઓમાં વરસાદ નોંધાયો છે. દક્ષિણ ગુજરાત 24 કલાકમાં મેઘરાજાએ ધમધમ્યું છે. જેમાં બારડોલીમાં સૌથી વધુ 6 ઈંચ વરસાદ નોંધાયો છે. જ્યારે દક્ષિણ ગુજરાતના 24 તાલુકાઓમાં 2 ઈંચથી લઈને 6 ઈંચ સુધીનો વરસાદ નોંધાયો છે. હવામાન વિભાગ દ્વારા દક્ષિણ ગુજરાત માટે યલો એલર્ટ જાહેર કરવામાં આવ્યું છે. આજે સુરત, ભાવનગર, અમરેલીમાં ભારે વરસાદની આગાહી છે. આ સાથે જ અમદાવાદમાં સવારથી જ ઝરમર ઝરમર વરસાદ શરૂ થયો છે.
હવામાન વિભાગે આજે ગુજરાતના 10 જિલ્લાઓમાં યલો એલર્ટ જાહેર કર્યું છે. આ 10 જિલ્લામાં આજે ભારે વરસાદની સંભાવના છે. 10 જિલ્લાઓમાં રાજકોટ, અમરેલી, ભાવનગર, ગીર સોમનાથ, દાહોદ, સુરત, તાપી, ડાંગ, નવસારી અને વલસાડનો સમાવેશ થાય છે.
ગઈકાલથી અમદાવાદના વાતાવરણમાં પલટો જોવા મળી રહ્યો છે. આજે સવારથી જ આકાશ ઘેરા વાદળોથી ઘેરાયેલું જોવા મળી રહ્યું છે. ત્યારે એસજી હાઇવે, થલતેજ, ઇસ્કોન સહિતના વિસ્તારોમાં ઝરમર વરસાદ શરૂ થયો હતો. અમદાવાદમાં આજે હળવો વરસાદ પડવાની શક્યતા છે.
દક્ષિણ ગુજરાતની વાત કરીએ તો બારડોલીમાં 151 મીમી, મહુવામાં 139 મીમી, વાલોડમાં 137 મીમી, નવસારીમાં 130 મીમી, ગણદેવીમાં 111 મીમી, જલાલપોરમાં 102 મીમી વરસાદ નોંધાયો છે. દક્ષિણ ગુજરાતના ખેડૂતો વરસાદથી ખુશ છે. આજે પણ દક્ષિણ ગુજરાતમાં મેઘરાજાનું ઉગ્ર સ્વરૂપ જોવા મળે તેવી આગાહી કરવામાં આવી છે.
સુરત શહેરમાં રાત્રે મેઘાએ તોફાની બેટિંગ શરૂ કરી હતી. સુરત શહેરના અનેક વિસ્તારોમાં પાણી ભરાયા હતા. શહેરના માર્ગો અને રહેણાંક શેરીઓમાં ઠેર-ઠેર વરસાદી પાણી ભરાઈ ગયા હતા. જેના કારણે લોકોને મુશ્કેલીનો સામનો કરવો પડ્યો હતો.
સુરતના ઉધના અને ડિંડોલી વિસ્તારમાં ઠેર-ઠેર વરસાદી પાણી ભરાયા છે. જેના કારણે માર્ગો પરથી પસાર થતા વાહન ચાલકોને ભારે હાલાકીનો સામનો કરવો પડ્યો હતો. સુરતના ડિંડોલી વિસ્તારમાં એક આઇસક્રીમની દુકાન અને ખાંડ વેચનારની દુકાનની બહાર બાઇક અને દુકાનની ખુરશીઓ ડૂબી ગયેલી જોવા મળી હતી.
માલપુરના આણિયોર અને આસપાસના વિસ્તારોમાં અચાનક વાતાવરણમાં પલટો આવ્યો હતો અને મોડી રાત્રે વરસાદ પડ્યો હતો. આણિયોર, આણિયોર કંપા, સુરત પુરામાં પણ વરસાદ પડ્યો છે. દિવસ દરમિયાન અસહ્ય ગરમી બાદ વરસાદે પણ વાતાવરણમાં ઠંડક પ્રસરી છે. ખેડૂતોએ પણ ખેડાણ કરીને ખેતર તૈયાર કર્યું અને રોપણી માટે વરસાદની રાહ જોવા લાગ્યા. આ સાથે જ અચાનક થયેલા વરસાદથી ખેડૂતો પણ ખુશ છે.