બનાસકાંઠા જિલ્લાના તાલુકા મથક દાંતામાં યોગ્ય એસટી સ્ટેન્ડ નથી, સિવિલ પણ ખાડામાં છે અને ચોમાસામાં પાણી ભરાવાને કારણે દર્દીઓને ભારે હાડમારીનો સામનો કરવો પડે છે. ગ્રામ પંચાયત પાસે ગામનું માળખું નથી. આવા તમામ પ્રશ્નો વચ્ચે પણ સરકારી જમીન અંગત નામે તબદીલ કરવામાં આવી રહી છે. જેના કારણે સ્થાનિક લોકોને ભારે અન્યાયની લાગણી થાય છે. ત્યારે આવા અનેક પ્રશ્નો સાથે દાંતાના ગ્રામજનોએ આ દબાણ દુર કરવા અને તાલુકાના હજારો નાગરિકોને સુવિધા પુરી પાડવા માટે આ જમીન પર સારું એસટી સ્ટેન્ડ કે આધુનિક સરકારી હોસ્પિટલ બંનેની માંગ ઉઠાવી હતી. આ સિટી સર્વે નંબર 21ની હકીકત અખબારોમાં સતત છતી થતી રહી છે. વારંવારની આજીજી છતાં તંત્ર હજારો લોકોની વેદના કેમ સમજતું નથી તે પ્રશ્નાર્થ છે. આથી દાંતાના ગ્રામજનોએ મામલતદારને આવેદનપત્ર આપી ત્યાં લોકોની સુવિધા માટે બસ સ્ટેન્ડ અને સિવિલ હોસ્પિટલ બનાવવાની માંગ કરી હતી.