નર્મદા ડેમના ઉપરવાસમાં પાણીની આવકમાં વધારો થતાં સરદાર સરોવર નર્મદા ડેમ 122.84 મીટરની સપાટી વટાવી ગયો છે. પરિણામે 24 કલાકમાં નર્મદા ડેમની જળસપાટીમાં ધીમે ધીમે 38 સેમીનો વધારો થઈ રહ્યો છે. નર્મદા ડેમમાં પાણીની આવક 23495 ક્યુસેક છે, જ્યારે ડેમમાંથી પાણીનો ઉપાડ 5178 ક્યુસેક છે. નોંધપાત્ર વાત એ છે કે, નર્મદા ડેમની મહત્તમ જળ સપાટી 138.68 મીટર છે, જ્યારે 121.92 મીટરના દરવાજા લગાવવામાં આવ્યા છે.
બીજી તરફ મધ્યપ્રદેશમાં ભારે વરસાદને કારણે ઈન્દિરા સાગર અને તવા ડેમના દરવાજા ખોલી દેવામાં આવ્યા છે, જ્યારે નર્મદા ડેમમાં ઉપરવાસમાંથી 23,303 ક્યુસેક પાણીની આવક થઈ રહી છે. જેના કારણે ડેમની સપાટી વધી રહી છે. આજે સરદાર સરોવર નર્મદા ડેમની જળ સપાટી 122.84 મીટરે પહોંચી છે. ત્યારે વીજ ઉત્પાદન માટે સરદાર સરોવર નર્મદા ડેમ 1 પાવર હાઉસ યુનિટ સીએચપીએચ શરૂ કરવામાં આવ્યું છે.
આજે પણ સરદાર સરોવર નર્મદા ડેમમાં 1732 મિલિયન ક્યુબિક મીટર પાણીનો જીવંત જથ્થો છે. જો કે આજે ડેમ 122.84 મીટરે પહોંચ્યો છે, જો નર્મદા ડેમ પર દરવાજા ન લગાવાયા હોત તો આજે નર્મદા ડેમ ઓવરફ્લો થઈ ગયો હોત. કારણ કે ડેમના દરવાજા સુધી ડેમની ઉંચાઈ 122.84 મીટર છે અને ડેમના દરવાજા સુધી 1 મીટર પાણી ભરાઈ ગયું છે, આ નજારો જોઈને પ્રવાસીઓ પણ ખુશ થઈ ગયા છે.
બીજી તરફ રાજ્યના ડેમો અને જળાશયોની સ્થિતિની વાત કરીએ તો રાજ્યમાં સર્વવ્યાપી વરસાદના કારણે જળાશયોમાં આવક થઈ રહી છે. રાજ્યના કુલ 207 ડેમમાંથી 19 સંપૂર્ણ ભરાઈ ગયા છે. કુલ 207 ડેમમાં 45.49 ટકા પાણીની ક્ષમતા છે. કચ્છના 20 ડેમમાં 50.93 ટકા પાણી છે. કચ્છના 20 ડેમમાંથી 4 ડેમ ભરાઈ ગયા છે. સૌરાષ્ટ્રના 141 ડેમમાં 49.57 ટકા પાણીની ક્ષમતા છે. સૌરાષ્ટ્રના 141 ડેમમાંથી 14 ભરાઈ ગયા છે. ઉત્તર ગુજરાતના 15 ડેમોમાં 49.38 ટકા જથ્થો છે. દક્ષિણ ગુજરાતના 13 ડેમમાં 35.16 ટકા જથ્થો છે. દક્ષિણ ગુજરાતના 13 ડેમમાંથી 1 ભરાઈ ગયો છે. મધ્ય ગુજરાતના 17 ડેમની ક્ષમતા 29.99 ટકા છે. સરદાર સરોવર ડેમની ક્ષમતા 56.62 ટકા છે.
ગુજરાતમાં મોસમનો સરેરાશ વરસાદ 36.02 ટકા નોંધાયો છે. કચ્છમાં અત્યાર સુધીમાં સૌથી વધુ સરેરાશ 94.9 ટકા વરસાદ નોંધાયો છે. સૌરાષ્ટ્રમાં સિઝનનો સરેરાશ 52.39 ટકા વરસાદ નોંધાયો છે. ઉત્તર ગુજરાતમાં અત્યાર સુધીમાં સિઝનનો 34.41 ટકા વરસાદ નોંધાયો છે. દક્ષિણ ગુજરાતમાં મોસમનો સરેરાશ વરસાદ 27.78 ટકા છે. પશ્ચિમ મધ્ય ગુજરાતમાં સરેરાશ 24.59 ટકા વરસાદ નોંધાયો છે.
ઉલ્લેખનીય છે કે, ગુજરાત હવામાન વિભાગે સમગ્ર રાજ્યમાં વરસાદની આગાહી કરી છે. જેમાં સૌરાષ્ટ્ર-કચ્છ, દક્ષિણ ગુજરાત અને ઉત્તર ગુજરાતના ભાગોમાં ભારેથી અતિભારે અને અનેકથી અતિભારે વરસાદની સંભાવના વ્યક્ત કરવામાં આવી છે. અમદાવાદમાં પણ ભારે વરસાદની સંભાવના છે.