પંચમહાલ જિલ્લામાં સવારથી ધોધમાર વરસાદ વરસી રહ્યો છે.
પંચમહાલઃ ગુજરાતમાં છેલ્લા 24 કલાકથી સતત મેઘમહેર શરૂ થઈ છે. રાજ્યના મોટાભાગના જિલ્લાઓમાં ભારેથી અતિભારે વરસાદ પડી રહ્યો છે. દરમિયાન પંચમહાલ જિલ્લામાંથી એક સમાચાર સામે આવ્યા છે. પંચમહાલ જિલ્લાના હાલોલના ચંદ્રપુરા ગામની GIDCમાં દિવાલ ધરાશાયી થતાં 8 લોકો દટાયા હતા. જેમાંથી 4 બાળકોના ઘટનાસ્થળે જ કરૂણ મોત નિપજ્યા હતા. ઘાયલ લોકોને 108 એમ્બ્યુલન્સ દ્વારા સારવાર માટે હોસ્પિટલમાં ખસેડવામાં આવ્યા છે.
મળતી માહિતી મુજબ પંચમહાલ જિલ્લામાં સવારથી ધોધમાર વરસાદ પડી રહ્યો છે. ભારે વરસાદને કારણે અનેક ગામડાઓ અને શહેરી વિસ્તારોમાં પાણી ભરાઈ ગયા છે. જાહેર જીવન વ્યસ્ત બની ગયું છે. બીજી તરફ ચંદ્રપુરા ગામની જીઆઈડીસીમાં દિવાલ ધરાશાયી થતા 8 લોકો નીચે દટાયા હતા. જેમાં એક મહિલા ગંભીર રીતે ઘાયલ થઈ હતી. ઘટનાની જાણ થતાં જ 108 એમ્બ્યુલન્સ અને સ્થાનિક પોલીસની ટીમ તાત્કાલિક ઘટનાસ્થળે પહોંચી હતી અને કાર્યવાહી શરૂ કરી હતી.
પોલીસના જણાવ્યા અનુસાર, અકસ્માતમાં અસરગ્રસ્ત લોકો મજૂર છે અને તેઓ મધ્યપ્રદેશથી ગુજરાતમાં કામ કરવા આવ્યા હતા. હાલ 2 મહિલા સહિત 4 લોકોની સારવાર ચાલી રહી છે. જ્યારે 4 બાળકોના મોત થયા છે. પોલીસે અકસ્માત મોતનો ગુનો નોંધી આગળની કાર્યવાહી હાથ ધરી છે.