છેલ્લા બે દિવસથી બાયડ અને સાતંબા આસપાસના વિસ્તારોમાં મુશળધાર વરસાદ વરસી રહ્યો છે. જેના કારણે નદીઓ અને કેનાલો પણ છલકાઈ ગઈ છે. ઘરોમાં પણ ભીનાશ પ્રવેશી છે જેના કારણે જૂના મકાનો ધરાશાયી થવાની સંભાવના છે. ત્યારે સાતંબા નજીકના પ્રાંતવેલ ગામમાં મકાનની દિવાલ ધરાશાયી થઈ હતી.
બે દિવસ પહેલા બાયડના પ્રાંતવેલ ગામમાં ભારે વરસાદ પડ્યો હતો. જેના કારણે આસપાસના વિસ્તારોમાં ભેજનું પ્રમાણ ઘણું વધી ગયું છે. આથી જ ગતરાત્રે પ્રાંતવેલ ગામમાં એક 70 વર્ષીય વ્યક્તિ નાની શંકા માટે ઘરની પાછળની દિવાલ પાસે ગયો હતો અને અચાનક દિવાલ પડી ગઈ હતી, જેના કારણે વૃદ્ધ વ્યક્તિ દિવાલ નીચે દટાઈ ગયો હતો. દિવાલ તૂટવાનો અવાજ સાંભળી પરિવારના તમામ સભ્યો દોડી આવ્યા હતા અને દિવાલ નીચે દટાયેલા વૃદ્ધને બહાર કાઢ્યા હતા. વૃદ્ધને સારવાર માટે વાત્રક હોસ્પિટલમાં લઈ જવાયા હતા જ્યાં ફરજ પરના તબીબે તેમને મૃત જાહેર કર્યા હતા.