જેમાં 5 મહિલાઓ, 3 બાળકો અને 2 પુરૂષોના મોત થયા હતા
(GNS) અમદાવાદ, તા.11
રાજ્યમાં અવારનવાર અકસ્માતની ઘટનાઓ સામે આવે છે. આવી જ એક ઘટના અમદાવાદના બાવળા બગોદ્રા પાસે સર્જાઈ હતી. બાવળા બગોદ્રા પાસે ટ્રકની પાછળ નાનો હાથી ઘૂસી જતાં અકસ્માત સર્જાયો હતો. જેમાં 10 લોકોના ઘટનાસ્થળે જ મોત થયા હતા. તેમજ અકસ્માતમાં 3 લોકો ઘાયલ થયા છે. તેમજ અકસ્માતના કારણે ટ્રાફિક જામની સ્થિતિ સર્જાય છે. ઘટનાની જાણ થતા જ પોલીસ ઘટના સ્થળે પહોંચી ગઈ હતી. પ્રાપ્ત માહિતી અનુસાર, ટ્રકની પાછળ એક નાનો હાથી ઘૂસી જતાં આ અકસ્માત સર્જાયો હતો. પંકચર થયેલી ટ્રક રોડ પર ઉભી હતી. નાના હાથીની અંદર 3 લોકો આગળ અને 10 લોકો પાછળ બેઠા હતા. ચોટીલા જોઈને તેઓ પરત ઘરે જઈ રહ્યા હતા. ત્યારે અકસ્માત સર્જાયો હતો. અકસ્માતમાં 3 લોકો ગંભીર રીતે ઘાયલ થયા હતા.જ્યારે 10 લોકોએ જીવ ગુમાવ્યા હતા. ઘાયલ લોકોને તાત્કાલિક સારવાર માટે હોસ્પિટલમાં ખસેડવામાં આવ્યા છે. 10 મૃત્યુમાંથી 5 મહિલા, 3 બાળકો અને 2 પુરુષોના મોત થયા છે. પ્રાપ્ત માહિતી અનુસાર આ તમામ લોકો કપડવંજના સુંડા ગામના રહેવાસી છે. બીજી તરફ અમદાવાદમાં ગઈ કાલે વધુ એક હિટ એન્ડ રનની ઘટના બની હતી. આ ઘટના ગઈકાલે રાત્રે એલીઝબ્રિજ ખાતે બની હતી. જેમાં અજાણ્યા કાર ચાલકે બાઇક સવાર યુવાનને ટક્કર મારી હતી. આ ઘટનામાં જમાલપુરના ટોકરસાણી પોળમાં રહેતા સાહિલ અજમેરી નામના યુવકનું મોત નીપજ્યું હતું. અકસ્માત સર્જી કાર ચાલક ઘટના સ્થળેથી ફરાર થઈ ગયો હતો. પોલીસે સમગ્ર ઘટના અંગે તપાસ શરૂ કરી છે.