મહેસાણા એલસીબીની ટીમે અલગ-અલગ ટીમો બનાવી જિલ્લામાં દારૂબંધી પ્રવૃતિઓ આચરતા લિસ્ટેડ બુટલેગરો પર નજર રાખવા માહિતીના આધારે સતત પેટ્રોલીંગ અને દરોડા પાડ્યા હતા. જેમાં એલસીબીની ટીમે બ્રાહ્મણવાડા ચેકપોસ્ટ પાસેથી વિદેશી દારૂ ભરેલી આઈસર ટ્રક પકડી પાડી હતી.
મહેસાણા એલસીબી ટીમના જવાનો ઊંઝા પંથકમાં પેટ્રોલીંગમાં હતા. દરમિયાન ટ્રકમાં વિદેશી દારૂ ભરીને ચાલક પાલનપુર, સિદ્ધપુર થઈને ઊંઝા તરફ આવી રહ્યો હોવાની બાતમી મળી હતી. સમગ્ર મામલામાં એલસીબીની ટીમે બ્રાહ્મણવાડા ચેકપોસ્ટ પર તકેદારી રાખી હતી અને ટ્રક આવતાની સાથે જ પોલીસે ટ્રક કબજે કરી હતી. તપાસ દરમિયાન પહેલા ગોપારામ ભાવરામ મેઘવાલ, પછી રામ મોહનરામ મેઘવાલને ટ્રકમાંથી ઝડપી લેવામાં આવ્યા હતા. સમગ્ર કેસમાં પોલીસે રૂ.1,44,330ની કિંમતનો વિદેશી દારૂ, રૂ.20 લાખની કિંમતની ટ્રક, રૂ.10,000ની કિંમતના બે મોબાઇલ ફોન, રૂ.3500 રોકડા મળીને કુલ રૂ.21,57,830નો મુદ્દામાલ કબજે કર્યો હતો.