અરવલી જિલ્લા કોંગ્રેસ સમિતિ દ્વારા આજે મહાલક્ષ્મી ટાઉન હોલ, ચાર રસ્તા, મોડાસા ખાતે જાહેર સભાનો કાર્યક્રમ યોજવામાં આવ્યો હતો. જેમાં વિધાનસભા કોંગ્રેસના વિરોધ પક્ષના નેતા અમિત ચાવડા, પૂર્વ ધારાસભ્ય મહેન્દ્રસિંહ વાઘેલા, રાજેન્દ્રસિંહ ઠાકોર, જિલ્લા કોંગ્રેસ પ્રમુખ કમલેન્દ્રસિંહ પુરાર સહિત મોટી સંખ્યામાં કાર્યકરો ઉપસ્થિત રહ્યા હતા. કાર્યક્રમમાં ઉપસ્થિત લોકોએ ગટર, પાણી અને રસ્તાઓ અંગે પ્રેઝન્ટેશન આપ્યું હતું. મોડાસાના સર્વોદય વિસ્તારમાં રહેતી એક મહિલાએ જણાવ્યું કે તેના વિસ્તારમાં 40થી વધુ દારૂની દુકાનો ચાલી રહી છે. વિપક્ષના નેતા અમિત ચાવડાએ આ મુદ્દો વિધાનસભામાં લઈ જવાની ખાતરી આપી હતી. તેમણે આ મામલે જરૂર પડ્યે જનઆંદોલન શરૂ કરવાની પણ વાત કરી હતી.