પ્રધાન મંત્રી નરેન્દ્ર મોદી અમેરિકાની પ્રથમ રાજ્ય મુલાકાત માટે મંગળવારે રાત્રે ન્યૂયોર્ક પહોંચ્યા. આ દરમિયાન તેઓ સંયુક્ત રાષ્ટ્રના મુખ્યાલયમાં આંતરરાષ્ટ્રીય યોગ દિવસની ઉજવણીનું નેતૃત્વ કરશે અને વોશિંગ્ટનમાં અમેરિકી રાષ્ટ્રપતિ જો બિડેન સાથે દ્વિપક્ષીય મંત્રણા કરશે. પોતાના પ્રવાસની શરૂઆત પહેલા ‘વોલ સ્ટ્રીટ જર્નલ’ને આપેલા ઈન્ટરવ્યુમાં મોદીએ ચીનને ખુલ્લી ચેતવણી આપી હતી. પીએમએ કહ્યું કે ભારત સાર્વભૌમત્વ અને ક્ષેત્રીય અખંડિતતાનું સન્માન કરવામાં માને છે. ભારત કોઈપણ મતભેદો અને વિવાદોના કાયદાકીય અને શાંતિપૂર્ણ ઉકેલની તરફેણમાં છે, પરંતુ તેની સાર્વભૌમત્વ અને ગૌરવની સુરક્ષા માટે પણ સંપૂર્ણ રીતે તૈયાર અને સમર્પિત છે. મોદીએ કહ્યું કે ચીન સાથે દ્વિપક્ષીય સંબંધો માટે LAC પર શાંતિ પુનઃસ્થાપિત કરવી જરૂરી છે. સાર્વભૌમત્વ અને પ્રાદેશિક અખંડિતતાનું સન્માન કરવામાં અને મતભેદો અને વિવાદોના શાંતિપૂર્ણ નિરાકરણમાં અમારી મૂળ માન્યતા છે.
ભારત-યુએસ સંબંધો પહેલા કરતા વધુ મજબૂત અને ગાઢ છે
ભારત-અમેરિકા સંબંધોનો ઉલ્લેખ કરતા નરેન્દ્ર મોદીએ કહ્યું કે નવી દિલ્હી અને વોશિંગ્ટન વચ્ચેના સંબંધો પહેલા કરતા વધુ મજબૂત અને ઊંડા છે. બંને દેશોના નેતાઓ વચ્ચે અભૂતપૂર્વ વિશ્વાસ છે. અમેરિકાની આ મુલાકાત ભારત-યુએસ ભાગીદારીની ઊંડાઈ અને વિવિધતાને સમૃદ્ધ કરવાની તક હશે.
ચીન અને રશિયાને સ્પષ્ટ સંદેશ, ભારતની પ્રાથમિકતા શાંતિ છેઃ PM
મોદી અમેરિકન અખબારને કહ્યું, તમામ દેશોએ આંતરરાષ્ટ્રીય કાયદાઓ અને દેશોની સંપ્રભુતાનું સન્માન કરવું જોઈએ. મુત્સદ્દીગીરી અને સંવાદ દ્વારા વિવાદોનો ઉકેલ લાવવો જોઈએ, પીએમએ કહ્યું કે, કેટલાક લોકો કહે છે કે અમે તટસ્થ છીએ, પરંતુ અમે તટસ્થ નથી. અમે શાંતિના પક્ષમાં છીએ. તેમણે કહ્યું કે સમગ્ર વિશ્વને વિશ્વાસ છે કે ભારતની પ્રાથમિકતા શાંતિ છે.
ભારતનો સમય આવી ગયો છે
વૈશ્વિક મંચ પર ભારતના વધતા કદનો ઉલ્લેખ કરતા મોદીએ કહ્યું કે, આંતરરાષ્ટ્રીય રાજકારણમાં ભારતની ભૂમિકા વધી રહી છે. વિશ્વમાં ભારતનું યોગદાન ઘણું વધી ગયું છે. હવે ભારતનો સમય આવી ગયો છે. અમે ભારતને કોઈ દેશનું સ્થાન લેતા નથી જોતા. અમે માનીએ છીએ કે ભારત વિશ્વમાં તેનું યોગ્ય સ્થાન મેળવી રહ્યું છે.
યુએનમાં પરિવર્તનની હિમાયત
સુરક્ષા પરિષદમાં ફેરફારોની હિમાયત કરતા મોદીએ કહ્યું કે, વર્તમાન સમસ્યાનું મૂલ્યાંકન કરવું જોઈએ અને વિશ્વને પૂછવું જોઈએ કે શું તે ભારતને ત્યાં જોવા માંગે છે. મોદીએ કહ્યું કે ભારત વૈશ્વિક સ્તરે ઉચ્ચ, ઊંડી અને વ્યાપક ભૂમિકાને પાત્ર છે. આપણે ભારતને વિશ્વમાં તેના યોગ્ય સ્થાને જોઈ રહ્યા છીએ.