ગુજરાત પંચાયત સેવા સંહિતા મંડળ દ્વારા તલાટી સહમંત્રી સ્પર્ધા પરીક્ષા શાંતિપૂર્ણ માહોલમાં યોજાય તે માટે વહીવટી તંત્ર દ્વારા તમામ વિભાગો સાથે સંકલન કરીને તૈયારીઓ કરવામાં આવી છે. રાજકોટમાં તલાટીની પરીક્ષાનો રિપોર્ટિંગ સમય સવારે 11 વાગ્યાનો છે. ઉમેદવારને સવારે 11.45 વાગ્યા સુધીમાં પરીક્ષા કેન્દ્ર પર પહોંચી જવા પણ કહેવામાં આવ્યું છે. જો કે સવારથી જ તમામ પરીક્ષા કેન્દ્રો પર વિદ્યાર્થીઓની લાંબી કતારો જોવા મળી રહી છે. આથી દરેક કેન્દ્રની બહાર પોલીસ બંદોબસ્ત ગોઠવી દેવામાં આવ્યો છે.
રાજકોટ જિલ્લામાં 197 કેન્દ્રો પર 57000 થી વધુ ઉમેદવારો પરીક્ષા આપશે. રાજકોટમાં તલાટીની પરીક્ષા માટે 4000 જેટલા કર્મચારીઓ તૈનાત છે. તેમજ પરીક્ષામાં કોઈ ગેરરીતિ ન થાય તે માટે ખાસ વ્યવસ્થા કરવામાં આવી છે. જ્યારે રાજકોટ એસટી વિભાગ દ્વારા ઉમેદવારોને પરીક્ષા સ્થળે લઈ જવા માટે 200 બસોની વ્યવસ્થા કરવામાં આવી છે. સવારે સરોજીની નાયડુ શાળામાંથી પેપર ડિસ્પેચ પેજીંગ કરવામાં આવ્યું હતું. જેમાં પોલીસની ચુસ્ત બંદોબસ્ત વચ્ચે તેઓને અલગ-અલગ સેન્ટરોમાં મોકલી આપવામાં આવ્યા છે.
રાજકોટમાં તલાટી સહમંત્રીની પરીક્ષામાં હજારો ઉમેદવારો બેસવાના છે, પ્રશ્નપત્રો માટે પણ ચુસ્ત બંદોબસ્ત ગોઠવવામાં આવ્યો છે. તે માટે સીસીટીવી દ્વારા મોનીટરીંગ પણ કરવામાં આવી રહ્યું છે. આથી જિલ્લામાં જીપીએસ સિસ્ટમથી સજ્જ વાહનોમાં પ્રશ્નપત્ર સાથેનું સાહિત્ય પરીક્ષા કેન્દ્ર પર મોકલવામાં આવ્યું છે. આટલું જ નહીં પ્રશ્નપત્રોની સુરક્ષા માટે પોલીસ કર્મચારીઓ રસ્તા પર તૈનાત જોવા મળ્યા હતા.