હાલમાં આગામી સપ્ટેમ્બર માસ સુધીમાં હોસ્પિટલમાં ઇન્ડોર ઓપીડી શરૂ કરવાની તૈયારીઓ જોવા મળી રહી છે.
રાજકોટ અને સમગ્ર સૌરાષ્ટ્રના લોકો માટે રાહતના સમાચાર છે. રાજકોટમાં નિર્માણાધીન AIIMS હોસ્પિટલ પૂર્ણતાના આરે છે. હાલમાં આગામી સપ્ટેમ્બર માસ સુધીમાં હોસ્પિટલમાં ઇન્ડોર ઓપીડી શરૂ કરવાની તૈયારીઓ જોવા મળી રહી છે. સૌરાષ્ટ્રના રહેવાસીઓએ હવે કોઈ તબીબી સેવા માટે અમદાવાદ જવું પડશે નહીં.
250 બેડની ઇન્ડોર હોસ્પિટલ આગામી સપ્ટેમ્બરથી કાર્યરત થશે, જ્યારે ઓપીડી સેવા પણ જાન્યુઆરીથી શરૂ થશે. રાજકોટ સહિત સૌરાષ્ટ્ર માટે મેડિકલ ક્ષેત્રે વરદાન સમાન એઈમ્સ હોસ્પિટલમાં 250 બેડની ઈન્ડોર હોસ્પિટલ શરૂ થવા જઈ રહી છે.
હાલ જામનગર રોડ પર પરપીપળીયા પાસે ઉંડેરી ખાતે એઈમ્સ હોસ્પિટલનું નિર્માણ કાર્ય ચાલી રહ્યું છે. ત્યારે આગામી સપ્ટેમ્બરથી ઇન્ડોર બેડની સુવિધા પણ ઉપલબ્ધ થશે. આ સેવા શરૂ થવાથી રાજકોટ સહિત સૌરાષ્ટ્રના દર્દીઓને સીધો ફાયદો થશે. એઈમ્સનું કામ અત્યારે પૂરજોશમાં ચાલી રહ્યું છે. ઇન્ડોર હોસ્પિટલથી શરૂ કરીને આ હોસ્પિટલમાં જનરલ સર્જરી, માઇનોર ઓટી, સગર્ભા મહિલાઓની ડિલિવરી, ઓર્થોપેડિક ઓપરેશન, હૃદયના દર્દીઓની સારવાર સહિતની સુવિધાઓ ઉપલબ્ધ હશે.
દર્દીઓને ડિજિટલ એક્સ-રેની સુવિધા પણ ઉપલબ્ધ થશે. દર્દીઓને માત્ર 150 રૂપિયામાં ડિજિટલ એક્સ-રેની સુવિધા મળશે. આ તમામ સેવાઓ સપ્ટેમ્બર મહિનામાં શરૂ થશે.
આગામી સપ્ટેમ્બર માસના અંત સુધીમાં આ કામગીરી પૂર્ણ કરી ઇન્ડોર હોસ્પિટલ શરૂ કરવામાં આવશે જે સૌરાષ્ટ્રના દર્દીઓ માટે ખૂબ જ લાભદાયી પુરવાર થશે. જણાવી દઈએ કે તાજેતરમાં કેન્દ્રીય સ્વાસ્થ્ય મંત્રી મનસુખ માંડવિયા એઈમ્સ હોસ્પિટલની મુલાકાત લીધી હતી. જ્યારે મનસુખ માંડવિયાએ કામની સમીક્ષા કરી અને AIIMSનું કામ ઝડપથી પૂર્ણ કરવાના આદેશ આપ્યા, ત્યારે કામમાં તેજી આવી રહી છે.