પેરિસ
સ્ટાર ફૂટબોલર લિયોનેલ મેસ્સી આ સિઝનના અંતમાં પેરિસ સેન્ટ-જર્મૈન (PSG) સાથેનો બે વર્ષનો કરાર સમાપ્ત થયા બાદ ફ્રેન્ચ ક્લબ છોડે તેવી શક્યતા છે. વિકાસથી પરિચિત વ્યક્તિએ નામ ન આપવાની શરતે એસોસિએટેડ પ્રેસને જણાવ્યું હતું. તેણે કહ્યું કે મેસ્સી પરસ્પર સહમતિથી આ ક્લબ છોડી રહ્યો છે.
ક્લબની પરવાનગી વિના સાઉદી અરેબિયાની મુસાફરી કરવા બદલ પીએસજીએ મેસ્સીને સસ્પેન્ડ કર્યાના એક દિવસ બાદ આર્જેન્ટિનાના સ્ટારના તેના જવાના સમાચાર આવ્યા છે. સાઉદી અરેબિયામાં પર્યટનને પ્રોત્સાહન આપવા માટે મેસ્સીનો મધ્ય પૂર્વના દેશ સાથે બિઝનેસ કોન્ટ્રાક્ટ છે. અટકળો પ્રચલિત છે કે તે આ સિઝનના અંતે મોટી રકમ માટે સાઉદી અરેબિયાની ક્લબમાં જોડાઈ શકે છે. એવી પણ ચર્ચા છે કે તે બાર્સેલોના પરત ફરી શકે છે, જ્યાં તેણે તેની કારકિર્દીનો મોટાભાગનો સમય પસાર કર્યો હતો. તે અમેરિકામાં મેજર લીગ સોકરમાં રમે તેવી પણ ચર્ચા છે.